劉倩婷風水情緣

一命二運三風水,將下嫁堪輿學家李丞責的港姐劉倩婷幸運地集三家之大成,喜獲一個煮得、Talk得的十項全能老公仔。雖然趕不及生龍仔龍女,他們卻趁龍年孕育另類愛情結晶品─開舖頭,宣揚締造這段美好姻緣的風水文化!

港姐冠軍劉倩婷(Sandy)是一名典型回流竹升妹,深受西方文化薰陶的她,對中國歷史一知半解,豈會想像到將來的夫婿竟是堪輿學家?她與李丞責(James)的愛情,老土一點、玄學一點講句,皆因一個「緣」字,故事發展要追溯到2009年Sandy參選港姐這年份:「參選港姐仲好似尋晚發生嘅事咁,係人生其中一個高峰。」因參選港姐,她有緣與James拍攝《香港玄案》,密集式的相處令她看清楚對方的優點,慢慢培養出細水長流的感情。

James對她來說,是一本活生生的人肉文化字典,上至天文、下至地理,無所不精,只要她有任何疑難,問James就會有長篇的答案,好過上網搜尋!

齋睇外表,James一本正經,私底下卻是個追求浪漫及生活情趣的柔情漢子,逛古董店時會為她細心挑選首飾,就算下廚同樣中西皆宜,包括鵝肝羊扒及炆鮑魚!跟很多情侶一樣,他們平日的消遣並不怎樣驚天地泣鬼神,行街、睇戲、食飯已教他們一樂也,Sandy說:「我哋明白知足常樂,做少少嘢已經好滿足,我覺得要學會珍惜緣分。」

開舖覓接班人

眼看兩口子相處融洽,原來曾經過了一段「磨合期」,兩人早前以「情侶檔主持」遠赴南京,拍攝講述有關佛教及「佛頂骨舍利」的節目《同願同行》。這個奇妙的經歷令他們明白到尊重、包容及惜緣的重要,Sandy認為愛令他們達到更高的境界:「感覺時間過得好快,過去一年裏面大家互相扶持,經歷咗好多風雨,我哋嘅理念一樣,最重要互相珍惜大家,咁樣至會行到落去!」

婚期已定於明年2月2日,吉日當然由James決定,Sandy亦很開心:「吉日其實唔易計,唔係淨係單靠睇通勝,仲要夾番當事人嘅時辰八字。暫時預計會擺五十圍,想所有人分享喜悅。」他倆婚後有意生小朋友,但絕無造人壓力,可幸他們將製造另類愛情結晶─夾手夾腳開設「李丞責中華風水文化」,Sandy今次凡事親力親為:「想等社會多啲人接觸風水文化,將風水文化普及、年輕化,同埋搵有潛質嘅接班人。」她笑言想拜James為師,但距離專業,她仍有一段漫長的道路!雖然她忙於籌備婚禮及新舖,但嘴角泛起的甜蜜微笑足以說明一切也是值得。

後記:準李太未Ready

近期愈來愈多人以「李太」稱呼Sandy,她笑言一時未能反應:「都未習慣呢個叫法,但係都好開心,甜絲絲嘅,係喎,原來我就嚟做『李太』喇喎,即將踏入人生嘅另一個階段!」對於幸福,每個人的定義也不一樣,需要時間去尋覓,她認為最緊要是享受過程。

韋芷茵

劉倩婷冧讚李丞責似人肉字典般學識廣博,外表斯文,內裏浪漫。

劉倩婷坦言與未來老公經歷不少風雨,大家學懂互相珍惜。

劉倩婷未有造人壓力,反而着力夫妻檔開舖炮製另類愛情結晶品。

劉倩婷指參選港姐是人生一個高峰。

陳敏之(右起)、劉倩婷、李丞責等主持節目《香港玄案》。

劉倩婷和李丞責明年2月2日拉埋天窗,預計擺50圍大宴親朋。