茵媺拒與陳豪演情侶
無綫小花陳茵媺與陳豪感情穩定，拍拖初期正值拍攝劇集《天梯》，不過劇中甚少對手戲：「嗰陣開工都冇時間拍拖，我見得最多係黃德斌！（情侶同場尷尬？）唔會，一齊拍劇都冇乜嘢，不過最好就唔好做情侶角色，保留啲私隱好！」性感爽朗的她，劇中演繹悲情角色，故拍攝時要自己壓抑：「開工時盡量唔准自己笑，保持低落情緒演戲！」
問到可有信心憑《天》劇奪獎？茵媺說：「冇諗！有獎當然開心，因為係鼓勵，不過我唔想畀壓力自己，只想不斷進步，做個好好嘅演員，希望將來人哋會讚我！」熱愛演戲的她，希望過美國讀戲一、兩年，可惜時間不容許，或修讀短期課程。
陳茵媺希望不會與陳豪演情侶，保留一點私隱。
性格開朗的陳茵媺，破格演繹悲情角色。