顏卓靈傻勁爭戲

獲封「齙牙薛凱琪」的影壇新人顏卓靈，早前擔正跳舞電影女主角，盡情發揮跳舞技藝，更不惜負傷開工！她坦言有幸被揀中，全因試鏡時亂叫亂跳，表現出大無畏傻勁！

今年18歲的影壇新人顏卓靈（Cherry），出道時被冠以「齙牙薛凱琪」稱號，其精靈外表早前獲睇中，在本地跳舞片中擔正女主角，大耍「舞」功，一次過滿足了兩個願望：「我由細到大都鍾意舞蹈，係近兩年要應付考試跳少咗，所以最開心有得拍戲又可以跳舞，可以盡情發揮！」

對於有幸擔正，Cherry表示與導演及劇組人員結緣於兩年前，當時全靠一股傻勁而得米：「當時Casting我有練定舞，不過有段音樂位我冇預備，於是就亂叫又手舞足蹈咁自我介紹，搞到導演同監製大笑！其實我唔係跳得特別好，可能因為我似個角色咁傻氣！」向來以冬菇頭為個人標記的她，今次特別染紅髮突出個性：「表面仲有好多黑色頭髮，但底層就染咗紅色，跳舞嘅時候啲頭髮飛起晒就會睇到，象徵內心有團火！」

日夜顛倒都OK

事前，Cherry接受大量跳舞排練，體力需求甚大，為了珍惜第一次做女主角機會，她自然全力以赴，更不惜負傷上陣：「連續幾個星期都要開工，日夜顛倒晒！不過每次有戲拍我都好珍惜！（練舞受傷？）都有啲高難度動作，整親左腳，敷完跌打藥仲皮膚敏感，雖然一路跳一路痛，不過我都照用力，唔想就住就住！」