Super Girls制服誘宅男

女子跳舞組合Super Girls吸金冇停手，早前更首次接拍廣告，眾女拍攝時玩唔停，誓要以制服誘感迷倒宅男，她們笑指藉此吸納更多粉絲，為下月推出的處女唱片造勢。

由5位青春模特兒Cheronna、Aka、Yanny、Heidi及Jessica組成的女子跳舞組合Super Girls（SG），出道不足一年已密密出騷搵銀，早前更被信用卡公司睇中邀拍廣告繼續吸金，更大玩空軍制服誘惑。5人首次以組合名義接拍廣告，心情緊張，亦得到客戶的重視，多位高層均來拍攝現場探班，令她們很開心，隊長Aka說︰「我哋充滿活力，好感謝客戶賞識，今次酬勞滿意，佢哋真係識貨！」

想做索爆機師

拍攝當日，5人笑聲響遍整個拍攝現場，即使踩足一日也未見疲態，休息吃飯時更說個不停，拿手上的飯盒大玩一餐。對於空軍制服誘感，Yanny笑言令她萌生考空軍的念頭，並揚言要做個索爆女機師︰「好多女仔都想做空姐，但我就想考空軍，因為啲制服一樣咁靚，仲會刺激啲！」Heidi則指造型可以迷到不少男粉絲，更打趣指要用這個造型箍實男友︰「個造型幾吸引，其他女仔都可以試吓咁着去吸引異性。」

此外，今次選用她們的主打歌《話愛就愛》作廣告歌，剛巧她們下月推出處女碟，Cheronna說︰「希望透過唔同平台畀更多人聽到，可以變咗一首洗腦歌。」而廣告片於網上大受歡迎，Jessica說︰「初頭擔心反應，依家知道咁多人鍾意放心晒！」