韋綺姍教糖妹唔教親女

暫別樂壇10載的韋綺姍(Rita),再次踏足舞台會知音,即將在屯門大會堂跟蘇姍舉行2場個唱,Rita為此積極跳舞收身,由高峰期150磅減掉20磅,她笑說:「之前真係好鬼肥。」她更邀請組合糖兄妹任嘉賓,最近糖妹更跟她學唱歌,她大讚糖妹是一個乖學生:「佢上堂好認真,我寧願教佢都唔教自己個女。」

Rita的大女兒已16歲,亭亭玉立,細女13歲,女兒遺傳了她的音樂細胞,熱愛唱歌,剛在香港一個歌唱比賽贏得冠軍,她說:「佢依家喺英國讀書,學校有咩表演佢都有份唱。(想佢加入樂壇?)我唔反對,但要讀好書先。」她又透露老公、女兒都支持她復出唱歌:「過去十年,我專心湊女照顧家庭,因為細個父母離婚冇家庭樂,所以唔想自己家庭係咁,依家佢哋大個,我可以做番啲自己鍾意嘅嘢!」

糖妹(左起)、糖兄獲邀擔任韋綺姍個唱嘉賓。

韋綺姍積極跳舞收身,減掉20磅肥肉。

韋綺姍(左起)、梅艷芳和黃汝玲於第一屆新秀歌唱比賽分別奪得銀獎、金和銅獎。(資料圖片)