周永恒買餸湊女一腳踢

歌手周永恒早前榮升第二任爸爸，除忙於湊兩位千金外，亦要照顧坐月的太太趙頌茹（Yu），故自稱「萬能保母」，自言辛苦過做苦力的他，因貪方便誤食Yu的補品而燥到「爆眼」。

周永恒（Roy）的細女愛希於本月3日凌晨出世，Roy日前受訪時表示正忙於為細女拍攝出浴照：「雖然我湊女有一手，大女信希都係我湊大，但細女愛希啱啱出世太細個，全身軟綿綿，都怕粗手粗腳整親佢，所以同細女沖涼都係交畀老婆做，我就做攝影大師，幫愛希拍攝第一輯出浴照。」

樂做湊女公

由於太太Yu正坐月，不宜過勞，故家中一切大小家務均由Roy一力承擔，要照顧一大兩小的Roy大呻每天忙到「冇覺好瞓」：「要餵細女飲奶同換尿片，又要兼顧2歲大女信希嘅起居飲食，老婆又要爭取時間休息，所以家務全部都係我做，連落街買餸都係我負責，其實太太未生之前，我都係做買餸佬，雖然好累，但覺得好開心。」

Roy又自爆「瘀」事：「有次因為貪方便，見煮多咗畀太太補身嘅椰子燉雞飯，咪將補品當正餐食囉，點知第日眼睛就爆咗微絲血管，可能太補啦！唔知男人唔可以食女人坐月啲補品，下次唔敢再食喇！」問到現時再添新成員可會加重經濟壓力？Roy說：「壓力一定大咗，但唔係來自經濟壓力，係家庭壓力。」他強調一直有工作，每月接了不少教會騷及作曲工作，收入穩定，故着大家不用擔心其生計問題。