超雲開始諗結婚

賭王千金何超雲與陳山聰的婚訊傳得鬧哄哄，一直三緘其口的超雲突然一反常態，公開澄清山聰並未求婚，但坦言開始思考婚姻問題。

賭王何鴻燊的三房千金何超雲，盛傳於明年初與男友陳山聰拉埋天窗，昨日她接受本報電話訪問時笑說：「婚就會結，係人生階段！（同山聰結？）世事無常，冇得講定同邊一個，或者佢冇咁嘅打算呢！（你有其他暗示？）冇，呢個係事實吖嘛！唔到發生大家都唔知！」

否認母親反對

而她昨晚出席公開活動時，記者上前恭喜她，她即反問：「乜嘢呀？（你結婚囉！）婚總係要結嘅，但我未諗幾時囉！（你哋影咗結婚相？）其實喺你哋傳之前，我從未諗過要結婚，你哋依家傳得咁勁，我今晚開始諗吓！」問到山聰是否已於葡萄牙求婚，她停了一秒後擰頭說：「冇求婚！」

有指超雲本打算在電視節目公開婚訊，但因母親陳婉珍阻撓而擱置，對此她嚴正聲明：「媽咪同我哋三姊弟一向感情好好，畀好大自由度我哋，我唔想抹黑佢，會影響佢聲譽。」問到假如二人結婚，父母會有何反應，她說：「未諗喎！不過爸爸都有催嘅。（覺得結婚係兩個人嘅事？）其實結婚都係你哋寫。（媽咪有冇講咩？）失實嘅報道，冇興趣談論。」她曾在instagram中表示「大家只會祝福明星x圈外人……怒罵那些名人x明星……其實大家真的忽略了愛的意義」，問到是否有感而發，她說：「其實係睇八卦雜誌，對配對啲睇法啫！」她還透露日前已跟山聰食飯慶祝生日，並送上一份普通禮物。

事後，活動公關在微博上幽默地對超雲說：「係唔係陳太都唔重要了！」超雲即回應：「我係何小姐！」而同場還有甄子丹太太汪詩詩、名模琦琦及歌手蘇永康等。