傅穎入行似玩過山車：真係需要屋企人接濟

歌手傅穎近年撈過界出書、拍戲接劇，但原來她出道初期要靠家人接濟。曾被公司雪藏的她自言入行像玩過山車，但她立志35歲前做富婆，買海邊小屋！

自己喺事業方面都Set咗一個目標，但呢個係秘密，我唔會同人講！不過，我相信人生除咗事業都會有其他嘢要做，我想做一個成功嘅人，我係想要一輩子Whole Life開心嘅人生。啱啱組成Cookies時收入唔多，真係需要屋企人接濟，但係入行第二年已經可以靠自己！因為自己唔會亂用錢買衫，我又唔識計數，總之夠用就得！我唔會追求名牌，成日覺得買貴嘢好唔抵，自己第一個名牌袋都係舊年先買。因為家姐做律師搵好多，成日嫌我用麻布袋寒酸，結果舊年走去Chanel買咗第一個名牌手袋，諗諗吓都係應該有個袋傍身嘅！

入咗呢行之後，我覺得娛樂圈係一個勁易搵錢，又係勁易搵唔到錢嘅地方，就好似過山車一樣，好多嘢好講運數，真係好刺激！自己試過停咗兩年少咗工作，成日屈喺屋企，屈到好唔開心，但有日諗通咗，覺得自己唔可以咁頹廢，就去咗買畫具畫畫，之後就出書啦！

目標做富婆買大屋

我覺得自己際遇都OK，雖然多年嚟高高低低，但起碼依家唔愁三餐，但暫時希望35歲前可以做到富婆，有能力賺夠買一間有花園天台嘅海邊小屋，哈哈！當然愈早愈好啦！至於音樂事業，之前畀人話走音嗰排，上台真係好驚，但係上一隻碟令我重拾信心，克服咗自己嗰關。雖然我呢排冇出碟，但我相信一定有機會爭番口氣畀人哋睇！（全文完）

後記：避談謙仔

傅穎由童年點滴至不和是非、走音都無所不談，近日有指她「膠面」，她即叫記者「搣佢塊面」，並指着眼袋位說：「我開始有皺紋，點會膠？」但談到與羅仲謙的一段情時，她從冇提及「羅仲謙」三個字，只很避忌用「佢」來稱呼，看來她未完全放下舊情！

口述：傅穎　

筆錄：音樂組