羅霖劉坤銘3月分居

被公認是圈中模範夫妻、結婚接近17年的羅霖與劉坤銘，原來早於三月時已分居！她接受本報訪問時表示曾經力挽感情，可惜因性格分歧難以修補，但強調分居導火線絕非是有第三者出現。

現年47歲的羅霖（Candy）與57歲的劉坤銘結婚近17年來一直恩愛，可是最終敵不過性格分歧，早於三月時已秘密分居！Candy昨日接受本報電話訪問，談到為何分手，她嗚咽地說：「為咗保護三個小朋友，一直唔敢同人講分居呢件事，我哋分手原因係性格不合，咁多年嚟實有爭執，但最後都係解決唔到，真係家家有本難唸的經。依家我哋仲未辦離婚手續，因為都希望可以挽救到，我哋都好錫三個仔，唔想佢哋喺一個唔健全嘅環境成長，佢哋係最無辜！最少都會保持到朋友關係，咁先可以為三個仔有商有量，佢哋都想我哋喺番埋一齊，但唔可以勉強。」

擔心三子受影響

社交圈近日盛傳經常返內地做生意的Candy與一名男子過從甚密，她強調婚姻失敗絕不存在第三者：「我真係唔想亂咁畀人作，出面已經有謠言話有第三者，我話你知一定冇！唔想因為咁影響我嘅聲譽同形象，其實我同劉生分開，只有兩、三個朋友同阿媽知。」Candy表示三名分別16、14及7歲的兒子已得知父母分居一事，如今仍是兩人共同擁有他們的撫養權。提起三名兒子，Candy聲音沙啞地說：「好擔心三個仔，出面傳聞咁勁，好驚會影響到佢哋！為咗佢哋，我絕對唔會做出軌嘅事，一定要做個好榜樣畀佢哋。總之最難過嘅時刻已捱過，好彩有信仰支持我。講完今次，我唔想再講，唔想傳媒不斷追訪劉生同小朋友！」記者曾致電劉坤銘，他一聽到是記者即說：「我冇乜嘢補充，你哋問Candy啦！多謝關心。」

曾經力挽冇改善

其實兩夫婦曾嘗試希望破鏡重圓，分居後近半年內出席活動時均有影皆雙。今年四月，性感打扮的Candy在老公陪同下出席美酒活動，當晚形影不離；七月時，羅慧娟在新加坡病逝，兩人還飛往當地送別好友；直至近日，劉坤銘輕攬太太纖腰出席活動，他亦就舊愛鄺美雲拍拖一事大方回應，Candy坦言表示不介意，可惜的是私下夫婦關係依然沒有半點改善，忍痛承認分居。

雖然受分居一事困擾，但Candy日前與7歲細仔到銅鑼灣名店購物，有仔相陪心情大靚，揀選不消20分鐘已大有斬獲，最後簽卡埋單買下手鏈及耳環。細仔全程非常活躍，不時跑來跑去，會合母親後一同乘電梯離開。羅霖上落時拖實兒子，盡顯慈母本色。

羅霖於1991年奪得亞姐冠軍而入行，但最為人熟悉是演出無綫劇《真情》。1996年，她與富商劉坤銘於新加坡註冊結婚，從此淡出娛樂圈並誕下三子。接近17年的婚姻中，夫婦經歷不少風雨，打理家族傳呼台、酒樓與投資生意的劉坤銘，2000年因收購生意餘額未清而申請破產，但羅霖仍不離不棄，帶同三子跟隨丈夫移居新加坡。同年，他與友人在港發展科技生意，羅霖亦特別返港撐場，並否認婚變傳聞。

翌年在老公支持下，羅霖復出幕前，並為品牌行Catwalk。2004年，她與友人在新加坡合資開美容院，丈夫幫忙邀請嘉賓，更做司機接送。2009年，劉坤銘為事業移民上海，羅霖承認因未能習慣新生活而患情緒病，他亦答應返港生活，終於去年回流。翌年，羅霖自組經理人公司並簽下李彩華，夫婦再度活躍公開場合，不時表現恩愛。