傅穎冇對唔住Stephy

自言容易惹是非的傅穎(Theresa),多年來傳與「勁敵」鄧麗欣(Stephy)不和,她力證雙方從未有拗撬,但因傳媒「撥火」而令姊妹情不再,故與Stephy碰面時會有所避忌,問到會否主動修好?她說:「我控制唔到,可能同佢唔夠緣分!」

十年前,啱啱組成Cookies時大家感情幾好,因為大家都係妹心態,成班人柴娃娃咁去學跳舞!仲記得第一堂我跳得好生硬,成個機械人咁,畀人話完後,返屋企發憤練習,第二堂就畀老師讚!本來仲同5個Cookies女仔住宿舍,但我本身有支氣管炎同哮喘,加上成日食粉絲送嘅零食,搞到身子好弱,最後決定搬返屋企住。加上返到宿舍個個女仔要輪住沖涼同落妝,每晚瞓得三個鐘,好辛苦!

「被迫」比較

諗番Training嗰時同Kary(吳雨霏)、Stephy最熟,前排我先睇番一齊影嘅貼紙相!但後來點解同Stephy嘅是非會傳得咁「行」?其實諗番我哋都冇實質發生過咩事,都冇做錯嘢對唔住大家!但自從2007年獨立發展後,啲是非就開始好勁,可能係外界不斷將我哋比較,寫到「有你冇我」咁!

好多傳媒成日話我哋爭寵,其實出碟嘅嘢係公司決定,邊有得爭?爭一姐?話爭就爭到咩!但自此同Stephy見到面真係少咗嘢講!至於會唔會主動修好?其實好多嘢都控制唔到,都係睇緣分,可能我同Stephy唔夠緣分,只有做組合嘅緣!咁大家行分岔路後,我哋生活又開心咪OK囉!(明日待續)

口述:傅穎

筆錄:音樂組

近年甚少結伴露面的傅穎(右)與Stephy,於2009年的書展合照時「貌合神離」。