阿澤插無綫導演白癡

杜汶澤與早前拍戲疑遭無綫導演張永豪(Gary)暴力對待的「神獸女」劉蔚萱合作,阿澤大讚對方「話頭醒尾」,更上載合照到互聯網繼續喪插Gary﹗

杜汶澤與蔡卓妍(阿Sa)在英皇新片《超級經理人》內齊齊扮經理人,昨日開鏡禮上阿澤艷福無邊,與「旗下」性感八美合照時左擁右抱,老闆楊受成見狀亦笑說:「咁好?應該唔好收片酬啦!」有記者「恐嚇」要轉告田蕊妮,阿澤說:「呢個時候佢何嘗唔係喺TVB攬緊仔呢?」

八美包括「神獸女」劉蔚萱(Jenny),阿澤在開鏡前已上載二人合照到互聯網:「導演對她的演出作出調教,她都吸收得好快,足以證明那個TVB導演Gary是個白癡。」阿澤接受訪問否認「欽點」Jenny演出,但對她讚口不絕:「導演同監製問我好唔好用佢,我唔反對。喺片場佢一教就曉,搵到咁嘅新人就執到啦!(有指無綫發警告信畀Gary,但將Upload段片嗰個幕後處以停職!)如果無綫咁重視佢哋嘅知識產權,我都唔評論嘞!但要提醒啲新人有不安應該要出聲。」

阿Sa恨與男友拍戲

Jenny否認遭勒令封嘴:「媒體嘅威力好驚人,上次我都未睇報紙,啲加拿大同學已經不斷短訊問候,話喺互聯網度睇到(新聞)喎!」談到幫她伸張正義的工作人員疑遭停職,她說:「我唔知邊個囉!Feel Bad。」而無綫外事部副總監曾醒明則說:「上載片段到互聯網嘅同事違反咗紀律,所以公司作出紀律嘅安排,詳情因私隱問題不便透露。」

另外,霍汶希(Mani)大爆原本阿Sa「旗下」當紅明星一角,鎖定由陳偉霆演出,最終因合拍片改由內地演員高雲翔演出。問到阿Sa會否介意與男友合作,她說:「我係演員嚟嘅,梗係唔介意啦!今次拍戲諗番以前啱啱出道啲嘢!當時Mani好似放咗部錄影機喺我身邊咁,對我嘅行蹤瞭如指掌。」

影視組

阿Sa表示不介意與男友陳偉霆合作拍片。

扮演經理人的杜汶澤左擁右抱,與「旗下」性感八美包括劉蔚萱(左一)影大合照。

霍汶希和楊受成出席開鏡禮時十分開心。