楊怡擺款跌Watt子珊姦招截擊

無綫兩大花旦徐子珊及楊怡勢殺入視后最後五強，為爭寶座姊妹都冇情講！有指楊怡拉攏羅仲謙過檔無綫換獎，不過子珊都唔弱，近期在新劇中扮演毒女而大獲好評，趁民意收視好食住個勢，一於出「姦」招截擊楊怡！

每年無綫視帝視后均爭崩頭，加上今年大玩民意票選，一眾小生花旦既要有演技亦要得民心，當中勢必入圍的徐子珊及楊怡，爭鬥變得明朗化！繼本報日前披露無綫內部流傳的最後五強名單後，子珊及楊怡齊齊加大力度，有傳楊怡拉攏本屬星皓的緋聞男友羅仲謙過檔，博取無綫歡心！子珊當然不甘示弱，近期憑新劇《雷霆掃毒》「毒」出位的她，上周收視平均有31點，早前出口術揚言於劇中豁出去被輪姦的她，輪姦照率先曝光，相中她七情上面，有實力有Noise，有力擊退強敵！

抽離唔到 唔願見人

據知，該場被輪姦戲是子珊為救細佬，最後遭數名大漢輪姦。另一場戲講述子珊慘變毒后之後，迷糊間竟與黃智賢發生一夜情，子珊亦豁出去露背上陣！她昨日接受電話訪問時說：「呢場戲最初冇o架！我覺得冇所謂！嗰陣我入晒角色，情緒好波動！（當係視后之作？）有機會梗係想挑戰獎項啦！」她坦言接此劇時曾情緒低落，放工不願見人！對於有傳被楊怡拉攏羅仲謙「出招趕絕」，她說：「唔信佢係咁嘅人！」《雷》劇監製林志華亦大讚子珊交足戲：「佢有啲抽離唔到，低落到唔講嘢！（對佢奪視后有信心？）好有機會！」

至於楊怡在《On Call 36小時》演醫生備受讚賞，加上話題作《回到三國》，以及孭重飛的台慶劇《名媛望族》未出街，實行三路夾擊子珊！不過，今年無綫玩全民投票，楊怡與羅仲謙緋聞愈炒愈熱，網民認為她愈解畫愈亂，負面新聞令人氣跌Watt！加上她近日不時對傳媒擺款，繼日前拍外景問她何時收工，她即黑面拋出一句「冇戴錶」後，昨午在電視城又巨星上身拒受訪！至於星皓經理人部總監王小姐則否認謙仔簽無綫。

《雷》劇接投訴

通訊事務管理局昨日公布過去1周《雷》劇接獲5宗投訴，指意識不良。而黎芷珊主持的《最佳男主角》亦收到4宗投訴，指不尊重藝人，無綫則收到3宗。而查小欣主持的《爆足一周》則分別接2宗及11宗投訴，指節目內容只讀娛聞有點悶。