傅穎無悔戀謙仔

傅穎（Theresa）兩年前突然自揭與羅仲謙秘戀一年半兼被打，事後被公司雪藏，她坦言當時衰衝動但絕不後悔：「同佢一定唔會復合，佢唔係一個適合嘅人！」感情食白果，事業又遇阻滯的她將失敗視為得着！她將一連五日剖白感情世界、是非、整容傳聞及家庭等。

我承認過去嘅一段情其實冇得後悔，所有經歷都係自己嘅一部分，諗番起其實係得着嚟，經歷後個人會成熟咗！當再拍拖揀伴侶時，會知道自己點去面對！同佢段感情都有開心嘅時候，但我追求嘅愛情唔係短暫嘅開心，唔要一下子擦過嘅火花！但同佢一定唔會復合，以前好傻女，為唔啱嘅人唔開心真係好蠢。當依家清楚自己要一個咩人嘅時候，呢個人一定唔會係，知道佢唔係一個適合嘅人！

經一事長一智

我唔係想抹掉過去，但依家回望番先明白自己唔夠成熟，當年都係衰性格衝動，一股勁、心口勇字就去！都啱嘅，畀自己跌一跌，當係畀個時間自己收拾心情。不過好彩喺後生時有呢個經歷，如果年紀大啲再承受呢啲經歷，我會好辛苦！件事完咗之後，先覺得自己唔同咗、開心咗，諗嘢唔會再咁執着！舊年仲有時間可以靜靜哋睇書、做自己鍾意做嘅嘢，唔係依家都唔會有咁正面嘅心態去工作，就算同一件事再發生都會以成熟嘅手法處理，學到經一事長一智！

之前成日被人感動就會同佢一齊，依家就好清楚自己需要咩嘢，我會好認真投入愛情，但又唔係戀愛大過天，因為自己都好鍾意做嘢。我都計唔到拍過幾次拖，讀書時啲Puppy Love又唔知計唔計？加上之前我同好多人都離奇傳過緋聞，被人傳同鄭中基、方力申、黎諾懿等，啱啱出道時，仲試過傳我同何韻詩添！不過嗰時傻吓傻吓唔知發生咩事，都唔識點處理。但我開始得嘅感情都會睇長遠，唔會玩玩吓。

圈中人冇安全感

以前真係有其他圈中人追過我，但都係以前嘅事，圈中人真係唔啱我，我覺得好冇安全感！之前嘅男友都問我點解唔打畀佢？我從來都唔Check男友行蹤，因為我需要另一半互相信任、專一，個男仔一定要畀到我一種付託終身嘅感覺！而我絕對唔會「劈腿」，拍緊拖嘅時候，就算第個男仔條件幾好，都唔會畀機會佢，因為我性格係一個心裝唔落兩個人！即使第時拍拖都會拍到穩定先公開，依家世代好似公開都冇咩所謂，反而可能拍得舒服啲，我對拍拖冇咩特別期待，都係隨遇而安，都唔怕畀人話係剩女嘅！（明日待續）

口述：傅穎

筆錄：音樂組