譚筠怡空中飛人 Sky Diving天際翱翔

藝人譚筠怡喜歡追求刺激，為了完成兒時夢想，她去年決定挑戰自己，一試Sky Diving的滋味，結果不能自拔。而她亦喜歡潛水，用雙眼去感受海底這個寧靜又奧妙的世界。

由2011年2月至今，譚筠怡（Gwennie）已累積達80跳的成績，由「試玩」到「熟手」， Gwennie花了不少時間學習和鍛煉，至今已能在空中做出「Turns」、「Tracking」等不同動作的專業花式，她說：「其實Sky Diving最興奮嘅過程係一跳出機艙，可以做出唔同動作。基本上我最鍾意一跳出去就做個360度觔斗前轉，然後Free Fall，令我感到好自在！」

High爆打觔斗

Gwennie又分享個人的一套心得：「如果你追求速度可以玩Tracking，成個人伸直可以加快高空速度，如果玩Turns就好似飛機轉彎咁，成個人會隨住動作轉唔同方向，感覺好自由自在，好似隻雀仔喺天空四圍飛。仲有其他Free Style動作，好似喺空中坐無影櫈同一字馬等動作，但因為始終有氣壓同風向，一定要控制得好好！」

Sky Diving給人的感覺是一種很高風險及危險的活動，Gwennie卻有另一個看法：「其實意外率唔係好高，只係一千分之一，可能比喺路面嘅意外仲低。」但Gwennie透露亦遇過兩次驚險狀況：「有次我如常喺空中做花式動作，但到離地面4,500呎要打開主降傘時，點知個主降傘纏住咗打唔開，搞咗一輪已經去到離地面2,000呎，到達一定要打開降傘嘅時候，我決定Cut咗個主降傘，打開後備降傘，最終成功降落地面！」

樂趣險中求

另一次，Gwennie與三個女性朋友一齊跳出機艙，到打開降傘時要各自散開，避免降傘纏在一起，誰知打開降傘時才發覺與降落點距離太遠，她說：「遇到呢種情況，就要喺地面搵一個綠色地方降落，因為綠色最有機會係草地、平原，比較安全，而唔會係山坡或懸崖等地方。結果我搵到綠色地面就朝住個方向降落，點知嗰度原來係種滿兩呎高植物嘅大農莊，結果我成身損晒！」雖然驚險，卻沒有減退Gwennie對Sky Diving的熱愛，她說：「證明遇到事故唔使擔心，因為仲有個後備降傘發揮最大作用，令我覺得更有安全感！」

上天能飛 入水能潛

譚筠怡除了享受身處天空的感覺外，亦鍾情水底世界。已成功考獲OPEN PADI潛水牌照的她，於美國邁亞密南部的Key Largo首次接觸潛水，她說：「因為呢個島有好多特別嘅珊瑚，海底嘅世界無窮無盡，令人有好大嘅思考空間，心境會變得好平靜，好似去咗一個好和平嘅世界，個人好舒服！都有潛過去沉船嘅地方，可以睇到生物，係兩種唔同感覺。」 Gwennie表示考潛水牌不難：「你要讀書學識水壓、氣壓嘅基本知識同理論，要學點用氧氣筒同要做個測驗，又會考你喺水底除去眼罩、氧氣筒又再戴番，識得浮番上水面，目的係要學識自我求生嘅技能！」

動靜皆宜 珠寶大師

譚筠怡的藝術天分很高，近年她主力發展高級珠寶的設計生意，09更成立了個人品牌公司「Gwennie Tam Fine Jewellery」。曾修讀珠寶鑑證課程及珠寶設計課程並已畢業的Gwennie，憑個人設計作品「冰之魅影」勇奪在澳洲舉行的2011年國際澳寶珠寶設計大獎，以及高級珠寶系列冠軍及全場總冠軍，她稍後亦會參加《International Jewellery Design Excellence Award 2013》大賽，盡展實力！