王馨平開騷邀阿樂Jam歌
王馨平早前因余文樂在電影中翻拍其名曲《別問我是誰》MV而再人氣急升，她前晚出席活動時，宣布12月在九展舉行一場演唱會，以報答樂迷及導演彭浩翔的支持，問到屆時是否必唱《別》曲？她笑說：「唔止會，連演唱會個名都叫『別問我是誰』，係周慧敏幫我諗嘅。（請余文樂做嘉賓？）都想叫佢一齊唱。（你使唔使開始練歌？）都要，但唔使特別練氣，因為我平時有做運動。今次係我回歸樂壇，所以我會放重本喺樂隊方面。（下次喺紅館開個唱？）唔敢諗。（你係咪復出樂壇？）我唔敢講。」
同場的湛琪清（Jessica）多謝表姐汪圓圓教擺甫士影相，圓圓笑說：「我唔係亂教人o架！（有冇教佢社交技巧？）呢方面就唔使，亦都唔使教佢點識男仔，因為已經有好多男仔追佢，我反而要教佢點樣防人。」
王馨平開騷，希望邀得余文樂任嘉賓。
汪圓圓（右）踢爆Jessica多男仔追求。