Lynn自爆「攻城」節目

熊黛林（Lynn）日前被本報拍得登堂入室「攻城」歡度32歲生日，前晚她出席活動時笑容滿面，問到城城做過最令她Sweet的事時，她識做地說：「同我過生日已經好開心。」

模特兒熊黛林與天王郭富城關係愈見浮面，前晚她出席時裝活動時被問到牛一「攻城」十四小時如何慶祝，她扮傻反問：「影到咩？（二人世界做咗咩？）過生日之嘛，開心就得，唔理做咩。（送咩畀你？）送咗『友誼永固』四隻字。（獻唱賀你？）有唱生日歌。」問到會否與城城同居，她即說：「唔會，未試過同男仔咩。（咩？）同居。」但提到城城為她做過最甜蜜的事時，她冧爆地說：「同我過生日已經好開心。」

最怕有驚冇喜

城城即將於本月底生日，問Lynn屆時會如何「回禮」？她表示未計劃：「都唔知佢會喺度。（預備驚喜？）唔太鍾意驚喜，怕得驚冇喜！」又突然叉開話題：「好似送禮物畀朋友，好怕見佢拆開禮物面色難睇！（城城話要架開篷車？）咁我要努力幾耐先得？」她認為禮物不一定要昂貴：「得意嘢都得，（煮食？）可以諗吓。」記者提議她向開甜品店的Amanda S.請教，她說：「有時想整，但用手攪拌好攰。（整開篷車形蛋糕？）圓形已經好難，是但啦，你哋話咩就咩！」

同場的Amanda S.表示甜品店生意很忙：「最近請咗個經驗豐富嘅師傅，減輕工作，雖然唔平，但值得。」她笑言很久沒與老公外遊，蜜月旅行至今亦未實踐，問到何時生BB？她說：「慢慢，做好生意先！」