張天愛四度離婚冇得掹

芭蕾舞家兼時裝設計師張天愛（Flora）與第四任影星丈夫王盛德（羅素，Russell）宣布結束九年婚姻，昨日Flora接受本報電話訪問時表示彼此因文化差異而決定和平分手，雖經歷四婚四分，但名叫「天愛」的她永遠把愛情放在第一位，若無法維繫便會決斷分手，敢愛敢恨堪稱娛樂界的奇女子！

現年51歲的張天愛於2003年與相識逾20年的Russell共諧連理前經歷3段婚姻，二人結婚九年，張天愛的第4度婚姻仍逃不過離婚命運。Flora昨日接受本報電話訪問時，直認與Russell已分居一年多，正辦理離婚手續，她強調：「我哋分手唔涉及第三者或者係錢銀轇轕，係和平下分手，只係基於文化差異，Russell係好美國化嘅中國人，我就係好中國人思想。加上我求知欲好強，好多諗頭，我想Russell向多方面發展，但佢只想做好演員本分，最後變成大家價值觀好唔同。」

繼續尋愛

不過，Flora認為離婚並非一個壞的選擇：「我敢於去選擇，好過呃住對方！我係21世紀女性，有獨立思想，唔使靠老公養，可以選擇自己想行嘅路！」問到會否有機會復合？Flora斷言：「冇可能！佢想要好大空間，我就要將工作安排得密密麻麻，生活模式完全唔同。我同佢有好開心嘅時光，但冇辦法行落去就冇需要維持，但我哋關係依然好好。」雖然四婚四離，但Flora依然相信愛：「我叫天愛，愛情永遠第一，對我嚟講愛情太容易追求，我依家有另一樣嘢想發展，就係我嘅藝術學校。」問到為何選擇公開宣布離婚，Flora認為有必要對外交代，她舉例說：「如果有日Russell同個女仔出街食飯，畀人寫成出軌，咁對佢好唔公平！」此外，Flora日前接受查小欣訪問詳談離婚，將於今晚查小欣主持的節目播出。

女兒避談

另外，Flora女兒邢嘉倩前晚出席好友陳斯允的婚禮時，對於母親第四次離婚，她未有回答記者提問便匆匆入場。前妯娌馬詩慧對於Flora與Russell離婚一事全不知情，她說：「我同Russell見面起碼兩年前，佢好少講嘢，又好靜。（佢哋性格不合？）分開一定有好多問題，合則來不合則去，佢哋仲後生，仲有機會，緣分好難講。（Flora太女強人以致分手？）佢哋兩個好Sweet，喺Russell面前嘅Flora會變小女人。」

張天愛Profile

姓名：張天愛

年齡：51歲

簡歷：前市政局主席張有興的女兒，1990年獲「十大傑出青年」殊榮，並於2007年獲頒「世界傑出華人獎」。在英國皇家芭蕾舞學院畢業，創立自家時裝品牌，參與不少善舉。

羅素Profile

姓名：羅素

年齡：49歲

原名：王盛德 Russell Girard Wong

簡歷：與弟弟王敏德同為影星，在八十年代曾在美國歌手大衞寶兒及珍納積遜的MV中演出，於1985年來港和梅艷芳合演電影《歌舞昇平》，曾演出《盜墓迷城3》等電影。