陳倩揚一家三口遊南瓜城
榮升媽咪的陳倩揚（Skye）日前偕老公陳浩然及其16個月大的兒子陳羲廷（Auryn）到海洋公園親子一日遊！萬聖節將至，Skye與老公特地替囝囝穿上南瓜圖案的披肩，在園內充滿「哈囉喂」氣氛的「南瓜城」玩個不亦樂乎，爸爸陳浩然也化身攝影師為一家拍照留念。
不過手抱的Auryn正牙牙學語仍未懂事，故看着小丑及巫婆表演時，擘大個口兼眼仔碌碌四圍（目及），表情超級Kawaii！其後Auryn又不停扭媽咪抱，當正囝囝是情人的Skye也甜爆笑指Sweet過跟老公拍拖：「囝囝好鍾意我，平日返到屋企就會黐實我又攬又錫，但嗲哋見到就好眼冤！其實會黐到幾多年啫！將來佢識咗女友就唔會咁樣，但我哋關係咁好，第時應該唔會唔理我，相信我都會係個開明奶奶。」聞言「電燈膽」老公陳浩然也呷醋大叫：「快啲生番個女！」Skye則表示目前會專注照顧囝囝及努力搵銀，待兒子兩歲後再追女。
陳倩揚（前排左起）偕兒子陳羲廷及老公到海洋公園一日遊。