丁子高哦出綠色新一代

丁子高與太太楊千嬅均是環保分子，經常互相提點要慳水及垃圾分類，最近子高更設計T恤推動環保，並笑言若囝囝不聽話，便要鎖在房間訓話幾個鐘，一於長氣教仔！

女歌手楊千嬅於六月誕下愛子Torres後深居簡出，老公丁子高肩負養家責任密密工作，雖然忙得不可開交，但依然極力推動環保，子高與老婆均是環保分子，經常在家中互相提點要慳水及垃圾分類，他踢爆千嬅比較大頭蝦：「始終係女仔，化妝或者洗面都開住水，我會提佢閂水！（你環保啲？）我生活上注意啲，佢就多啲參加環保活動。」

最近子高與環保企業Green Monday及服裝品牌Quicksilver合作設計T恤及襪子，提醒大家每日都要注意環保及盡量吃素，囝囝出世後令他更深明保護下一代及地球的重要性，日後會積極灌輸環保意識：「會教個仔唔好開咁多冷氣，沖完涼嘅水可裝起佢再用，食多啲菜等等！」他又大讚Torres活潑但不難湊，對身邊事物充滿好奇心，是一名「八卦仔」。

拒做醜人

至於與千嬅教仔時誰演「好人」？子高笑說：「應該係我！我呢排比較忙，有時間都係陪佢玩，交畀千嬅做衰人，管教多啲！我第時仲會整個Private Corner，同囝囝傾密偈，講媽咪（千嬅）是非！」子高又自認是個長氣爹哋，若Torres將來百厭或不夠環保，會鎖他入房訓話：「好似ICAC查案咁，『哦』足佢幾個鐘，相信大部分小朋友都會認輸！」