鄭融慨嘆：錢唔易賺

鄭融形容現今藝人要百般武藝集一身，感慨時下年輕一代發明星夢，不惜賣肉出寫真博上位，而事實上娛樂圈「錢唔易賺」。

當年入娛樂圈我可以用「一舊飯」嚟形容自己，我唔係諗為咗要搵好多好多錢，只係因為鍾意跳舞，鍾意聽歌，難得有人畀機會就去試吓，完全唔係抱賺錢心態。但依家好多年輕人覺得做明星搵錢好容易，見好多女仔唔讀書走去做模，賣肉騷性感拍寫真集，以為就做咗明星，搵錢好易，佢哋咁就諗得太簡單。即如現今唱片市道咁差，唱歌出碟賺錢真係幾艱難，聽公司講商場活動都縮皮，不過，我自己就唔會諗太多，做好自己已經係幫緊自己。

藝人表面風光

娛樂圈競爭大，做藝人表面風光，其實唔易做，每個藝人成功背後，絕對要付出努力，唔係求其就得。雖然自己集中唱歌事業，但亦唔會畀自己局限於一樣嘢上面，都要不斷進修提升自己，希望每一個階段有新嘢畀大家見到，依家我最想深層次去學舞蹈，唔係單單上幾堂就算，係想用一個長時期訓練提升跳舞技巧，之前為咗首新歌《第五類》，就特別去學拉丁舞，至少真係做到新鮮感畀人睇到，我亦鍾情中國絲帶舞同西班牙舞，有計劃去學唔同嘅舞蹈，嘗試每首歌配合不同舞姿，歌迷對首歌都特別深刻。

而芸芸跳舞歌手中，我好欣賞台灣歌手蔡依林（Jolin），佢舞功出名犀利，佢能夠加入瑜伽、體操等動作，肢體嘅柔軟度係落好多苦功先練得到，佢又要跑通告、宣傳、錄音、出席活動，練舞嘅時間真係「唧」出嚟，所以，一分耕耘一分收穫，做成功藝人唔係玩玩吓，我都要向Jolin多多學習。（全文完）

後記：「一姐」不敢當

入行九年的鄭融經歷了幾間唱片公司，現是Neway旗下歌手並榮升阿姐級，阿融坦白得可愛地說：「點為之一唔一姐，呢啲只係一個字眼，係咪都要畀心機做嘢！稱號根本冇意思，公司冇乜歌手，所以先話我係一姐，自己就唔係好鍾意喇！」至於阿融對樂壇位置亦好老實說：「仲有好多進步空間啦！」

口述：鄭融、筆錄：音樂組