張嘉汶客串空姐償母願

神獸天使張嘉汶有多年模特兒經驗，最近踩入公仔箱演空姐，她笑言母親的兒時夢想正是當空姐，今次可謂一圓母願！她又大讚同劇的吳鎮宇型到爆，全天候Keep住Chok！

神獸天使「招財貓」張嘉汶（Coey）年僅20歲，但她14歲已開始做Part-time模特兒，台上經驗十足，並曾在Catwalk比賽中獲獎。回想當年仍是中學生的她，首次穿比堅尼行騷，令她非常難忘：「每個參加者打扮都唔同，得我一個被安排着泳衣，所以分外緊張，行騷時見到有評判喺度笑，原來我緊張到心口紅晒！」最後Coey憑步姿及口才贏得亞軍，可見她天生注定吃這行飯呢！

唔要型男

Coey在正拍攝的劇集《衝上雲霄II》中客串演空姐，她笑言可一圓母親童年的夢想：「媽咪以前夢想做空姐，又好想我考，雖然我冇做到，但依家畀啲造型照佢睇，佢已經好開心！」提到同劇主角吳鎮宇，Coey雖然跟他沒有對手戲，卻被對方的魅力迷倒：「我係上一集Fans，估唔到鎮宇十年嚟都冇乜變，真係幾Chok！無時無刻都咁型！（理想男友要似佢？）又唔需要咁型咁靚仔，好似冇乜安全感！」

拍劇拍上癮的Coey最希望挑戰古裝劇，扮演另一個時空的人物，雖然對白及做手難度甚高，但她相信會很過癮。而問到身為模特兒是否有很多裙下之臣，Coey卻謙稱異性緣麻麻，可能是外表冷酷所致：「同學知我做Model反而唔敢埋身，加上我份人比較慢熱，啱啱識以為我幾惡！」

Profile

姓名：張嘉汶（Coey）

年齡：20歲

三圍：32B、23、33

身高：1米65

體重：43kg

簡歷：14歲入行做兼職模特兒，去年簽約公司Celebrity，在KFC廣告中的「雞翼女」為人熟悉，今年在無綫遊戲節目《五覺大戰》中擔任神獸天使「招財貓」。