鄭融克服走光舞傷痛

鄭融早前與外籍型男拍攝新歌MV大跳拉丁舞，搞到「春光乍洩」喊足幾日，但她堅持舞照跳，以跳唱歌手之路為目標，更視容祖兒為學習對象。

多年嚟喺歌曲上面我都試過唔同路線，挑戰自己亦帶畀歌迷新鮮感，喺未來工作方向，我同唱片公司有共識走「跳唱歌手」路線！我好鍾意跳舞，又有13年芭蕾舞根底，希望可以喺舞台上盡量發揮。

歌手喺舞台上面最享受係可以同觀眾互動，而跳舞係最好嘅方法！喺芸芸女歌手當中，容祖兒同莫文蔚（Karen）都擁有舞台上嘅獨特魅力，祖兒嘅演唱會，我每次都有捧場，佢跳舞好有勁度，牽動到歌迷情緒同氣氛，係值得我取經嘅地方。至於Karen係我偶像，佢舞台上有唔少創意，印象最深一次係喺鋼架上面攀爬同跳舞，有難度又有新意！

死頂着高踭

做歌手一樣有血有汗，着住五、六吋高踭鞋載歌載舞一啲都唔容易，我都花咗好多時間練習同克服，好似《第五類》首歌我要同外籍男Dancer跳拉丁舞，節奏快又有唔少轉圈舞步，其中一個動作仲要將腳向後踢高，如果用錯力就會拉傷大髀筋，有時受傷係無可避免，我同自己講呢啲係工作一部分，要做成功嘅「跳唱歌手」就唔可以咁輕易放棄！

（明日待續）

口述：鄭融　筆錄：音樂組