顧嘉煇心郁郁開金口

樂壇之父顧嘉煇昨日舉行演唱會記者會，現場星光熠熠，心情興奮的煇哥更笑言有意開金口！

共四場的《顧嘉煇大師經典演唱會2012》將於11月底假紅館舉行，優先預訂的門票極速售罄，門票今天起公開發售，勢必掀起搶購熱潮。為隆重其事，主辦單位昨日舉行記者會，嘉賓鄭少秋、黃耀明、陳潔靈及林子祥等出席，群星拱照。

秋官「大俠」上身

席上安排眾星大談感受，煇哥笑言有意開金口：「好開心有咁多歌手支持我，搞到我都想唱番兩句，但我作嘅每一首歌，都係為嗰位歌手度身訂造，如果第二個唱就唱唔出感覺，所以都係唔唱喇！」煇哥談及亡友兼拍檔黃霑：「一直都夥拍黃霑開騷，今次我第一個演唱會都想有個環節紀念佢。」

談到屆時有何突破，嘉賓之一的明哥笑說：「我係坐尾班車得到煇哥嘅作品，好榮幸！聽講我負責演繹羅文嘅正氣歌，都有啲壓力！」陳潔靈亦大讚煇哥的成就：「佢嘅作品家傳戶曉，完全代表到香港，係香港人嘅驕傲。」明哥補充：「佢嘅音樂係一種國民教育，令我哋更認識80年代嘅香港。」與煇哥合作多年的秋官說：「我好早就知道有呢個騷，所以我準備咗7、8首武俠歌，最鍾意《忘盡心中情》！」