鄭融恨組「的骰四人幫」

鄭融憑着1米57身高殺入樂壇，但近年樂壇相繼出現不少「細細粒」生力軍，好像鄧紫棋（G.E.M.）、黃山怡（糖妹）與林欣彤（Mag），鄭融期望與她們合組「的骰四人幫」在紅館晒歌藝。

人哋話「同行如敵國」，G.E.M.、糖妹同阿Mag嘅唱功都畀人充滿Power嘅感覺，我哋都係身材嬌小一族，但絕對冇受身高所限，一樣可以做歌手唱歌。我亦冇諗過大家要比較，反而好欣賞佢哋三位，所以曾經忽發奇想，我哋四個人都未合作過，不如搞一個「細細粒演唱會」都唔錯，歌路上大家都有各自風格，有舞蹈、有搖滾、有可愛亦有靚聲，一次過滿足晒歌迷要求。

我好欣賞G.E.M.，畀人感覺好有Energy，佢「小巨肺」好厲害，我有捧佢演唱會場，覺得佢OK o架！而糖妹唱歌外仲識得創作，因為佢做《勁歌金曲》主持，令大家見嘅機會多咗。糖妹嘅爽直性格同我都有幾分相似，好似佢鍾意打War Game，都有叫我一齊去玩。三人之中，我同阿Mag比較少接觸，但都有留意到佢嘅歌，亦知佢聲帶唔舒服，希望佢盡快復原。其實歌手之間都可以好和諧團結，大家都係想做「好音樂」畀歌迷。

羨慕少女時代

當然，我都好欣賞擁有高挑身材嘅女仔，好似韓國女子組合「少女時代」，佢哋擁有修長索腿，跳舞時真係幾吸引！我係咪好羨慕？哈哈……又唔使要咁高，畀多我兩、三吋就夠喇！對我嚟講係着衫會容易啲，至少啲褲唔使改短，除咗呢樣就別無其他。記得當年出道一班新人中，我係最矮細嗰個，但從來冇因為身形問題而擔心會輸蝕，我好怕計數，最怕樣樣計住，我嚟唱歌啫，又唔係同人鬥高鬥皮膚白！

（明日待續）

口述：鄭融　筆錄：音樂組