劉欣宜睇BB衫趕嫁

o靚模「E Cup Baby」劉欣宜事業失意、愛情得意，被傳趕做龍年新娘的她，日前偕「未婚夫」拖狗在旺角恩愛出巡，化身連體嬰咀完狗又互咀，然後孖住睇BB衫，難道「搞大咗」要急急結婚補鑊？

o靚模大軍年年換新血，三年前出道的「E Cup Baby」劉欣宜，雖然擁有34E爆咪，但近年淡出幕前，只能回味其昔日「峰」采！封胸從良的她戀上音樂監製陳子敏，有傳兩口子雖然只拍拖年多，但已達談婚論嫁，趕尾班車做龍年夫婦。

少奶奶等人餵

這對青春戀人日前在旺角恩愛出巡，拖住隻迷你玩具貴婦狗，一家三口幸福滿瀉。他們先到一間廣場地庫睇精品，劉欣宜肉緊地咀完狗仔，急不及待跟男友分享狗仔口水，跟他來個蜻蜓點水式輕吻，似乎略欠衞生！然後繼續連環咀，完全漠視途人感受，其後二人拖手仔步往金魚街方向，一手抱狗仔的劉欣宜，堅持用另一隻手拖實男友，沿途十指緊扣，糖黐豆如連體嬰！期間他們購買小食互餵，你一啖我一啖相當煙韌。

當逛到賣嬰兒衣服的攤檔時，他們駐足細看並不停跟檔主討論，似乎相當有興趣，未知二人趕做龍年夫婦之餘，是否有意搶閘於明年生個蛇B？事後記者致電問她買BB衫是否自用，劉欣宜答得可圈可點：「冇呀，行過見到得意咪睇吓囉！」