鄭融對舊愛親疏有別

鄭融對愛情的態度就如她所唱的《終生學習》，提到「過氣舊愛」劉浩龍（師兄）與莊冬昕，明顯與師兄依然老友鬼鬼，相反對莊冬昕卻煞有介事：「冇嘢講佢。」

與「Ex」能否再見亦是朋友，好多人話提起莊冬昕會係鄭融死穴？我可以答絕對唔係！亦唔係唔講得佢，而係冇特別可以講出嚟同大家分享啫！有人問我係咪分手時搞到唔開心，所以做唔成朋友，我唔識答呢個問題，工作上係唔介意同佢合作。我係一個愛好和平嘅人，朋友間我從來唔會劃一條線去界定，我對身邊所有人都一樣「I Love All My Friends」！好多嘢諗得太複雜其實好無謂，順其自然唔會刻意避忌。以我嘅經歷未試過分手後做唔成朋友，其實係我唔會想同一個人冇朋友做，搞到成件事唔開心，點解要咁呢？

「被誤解嘅一群」

至於同劉浩龍（師兄）已經係「史前咁耐」嘅事情，依家保持住和平友好嘅朋友關係，佢嘅感情生活我從來唔會八卦多問，對於當日佢單方面宣布同容祖兒嘅戀事，即成箭靶畀人鬧到體無完膚，我只可以講唔係唔可以認拍拖，而係表達方式同用邊種方法去講出嚟。今次師兄係技術性出錯，而我身為佢嘅朋友點都會支持佢到底，無論外面幾橫風橫雨，作為朋友都會繼續撐佢。若然師兄為人真係咁差，身邊又點會有咁多朋友支持佢呢？所以係外界唔太了解佢而對佢產生一啲誤解啫。

我同師兄一樣屬於經常「被誤會」嘅一群，好似我上次去阿Fi（薛凱琪）生日會，有朋友送嘅生日蛋糕將「FiFi」寫錯「CiCi」，見咁搞笑咪攞住個蛋糕影相，之後就畀人鬧我連阿Fi個名都寫錯，只可以話作為一個公眾人物被誤會嘅機會係大過一個普通人好多。

相對同圈外人拍拖，整體嚟講係輕鬆啲，因為如果兩個都係藝人，大家會避免將對方掛喺嘴邊，要識得互相尊重。我依家嘅圈外男友係外國人，佢屬於思想成熟型，明白做藝人嘅生活同平常人唔同，佢會體諒我，唔需要我解釋太多。我唔係驚咗同藝人拍拖？我覺得做每件事要有勇於克服嘅勇氣，唔可以怕就避開，避咗就唔可以從錯誤中成長，吸收唔到教訓同道理，咪即係冇嘢袋到落袋？（明日待續）

口述：鄭融

筆錄：音樂組