「學神」方力申掟彎險撞筒

方力申日前由飛魚變「學神」考電單車牌，他試車時因High爆掟彎而險「撻Q」撞雪糕筒，引來不少女職員喪（目及），幸他於正式考試時超水準一Take Pass，看來快可與女友鄧麗欣（Stephy）遊車河了！

前飛魚方力申入水能游，想不到駕駛電單車都同樣有天分，本報收到讀者爆料，得知方力申日前考電單車牌。當日下午約三時，小方駕着座駕，獨自現身鴨脷洲駕駛學院。一身平民裝扮的他戴着黑色Cap帽及牛仔褲，甫到場即向考官報到。據知，小方當日是參加強制考試，通過後再擇日考路試，兩者合格方可正式取得電單車牌照。考試前，小方無懼33度的高溫，戴上安全頭盔及螢光「龜背」，自行取車與其他學員一同試車。High爆試車的小方頻頻掟彎，更一度險撞雪糕筒，非常驚險！事後，教車師傅不時向小方教路，他亦全程笑笑口受教。

試車逾三十分鐘，小方稍稍休息後即與三名學員攜身份證向考官報到及進行視力測試，考試前他更神態自若地與其他學員吹水！而數名學院女職員得知方大駕光臨考車牌，即急急腳出來喪（目及），一睹偶像駕車的英姿！

教車師傅激讚

被安排第三位上陣考車牌的小方吸取經驗，輕鬆駕電單車圍着雪糕筒兜圈三次再急停熄匙，雖然整個過程只有十分鐘，但他有板有眼！考試結束後約15分鐘，他得知Pass即以箭步攞車閃人。小方的教車師傅陳Sir踢爆他試前秘密練兵達12小時：「佢嚟過3次練習，每次練4個鐘！（Stephy有同行？）咁又唔覺眼！」他大讚小方有天分：「佢揸開車有Sense，加上游慣水平衡力好，所以今次輕易Pass咗！」