鄭融疑患妄想被害症

鄭融率直且敢愛敢恨的性格被譽為「樂壇小辣椒」,當年與劉浩龍愛得火熱,兩度遭公司雪藏仍無畏無懼,但原來阿融曾壓力爆煲,疑似患上妄想被害症,最終要休息半年做回「普通人」。

對我嚟講戀愛唔係大過天,當年外間所謂嘅遭公司雪藏,全因自己唔識得去處理問題,或者唔識將啲事情好好修飾,由出道開始我對好多事抱嘅態度都係唔想呃人,拍拖就拍拖,但公司會叫我唔好畀人知,叫我出嚟面對傳媒最好點講點講,為咗呢啲問題同公司嘈過無數次,個腦為呢樣嘢都諗咗好耐,好想搵到一個舒服位去解決,真係唔想講大話呃人。

EQ唔高困谷底

以前好多時好小事就影響到心情,覺得畀傳媒針對,諗嘢方向又好負面,搞到好唔開心,成日匿埋屋企喊,唔識點應付。有啲人天生EQ好高,可惜我冇呢方面嘅Hardware(硬件),久而久之我好似有「妄想被害症」咁,最慘對傳媒特別敏感,每次佢哋跟蹤我影我,都畀我發現到,就會諗你哋跟住我都唔會想寫我嘅好嘢,嗰刻就好想喊。

就喺兩年前,日積月累嘅壓力終於爆煲,嗰段時間好似跌咗落一個大窿入面,覺得每日都有好多把箭插住自己,瞓醒張開眼好似就快要死,感覺所有事都係黑色同充斥住負能量,因情緒困擾而要向公司請大假,用半年重過「普通人」生活。

當時都冇靠藥物治療,而係問自己想揀活喺黑洞入面定彩色世界,於是去接受心靈治療,嘗試跳出公眾人物嘅身份,做番一個普通人,約朋友行街食飯去玩,以平常人角度去睇每個問題,諗吓又會點解決。同時去咗學潛水,由細到大都好鍾意海,潛入海底世界感受寧靜同自由,鬱悶心情都豁然輕鬆,半年嘅「治療」成功調節心境,重上軌道,而最大得着就係考獲潛水牌。

重生變笑口棗

依家見到傳媒,唔會再好驚同唔開心,會主動上前同佢哋笑吓打吓招呼,反而佢哋會畀我呢啲行徑嚇親,我禮貌咁開開心心對你,大家無仇無怨,我用個心對人,人心肉做嘛,就算要寫我,我諗唔會每次都寫衰我啩!至於上年發生粗口鬧主播事件,我冇嬲件事被爆出嚟,反而慶幸件事曝光令自己識得反省,要控制脾氣,睇番成件事都接受唔到自己,唔會話喺一時唔小心講錯咗,呢啲只係藉口,莫非一句「唔小心」就可以講粗口咩?所以我有為我嘅行為感到內疚!(明日待續)

Profile

姓名:鄭融

英文名:Stephanie

出生日期:1984年10月10日

入行經過:在香港澳洲國際學校畢業後,被模特兒公司發掘並簽約經理人公司,其後試音成功加入當年的正東唱片公司而成為歌手。

成名作:2003年出道歌曲《成人對待》,而最為人熟悉的要數06年的《紅綠燈》,該曲橫掃各大電台電視台的音樂頒獎禮獎項,其他大熱作品有《終生學習》、《紅花會》、《小龍女》、《一事無成》、《健康教育》、《K歌之后》及《第五類》等。

口述:鄭融 筆錄:音樂組

向來勇字當頭的鄭融,經過半年的休息後,開始反思及改變。

入行多年的鄭融經歷過不少風浪,漸漸領悟出娛樂圈的生存之道。

當年正熱戀的鄭融及劉浩龍,曾把臂夜遊迪士尼樂園。

感性的鄭融曾於受訪時,提及愛犬離世而當眾落淚!

「樂壇小辣椒」鄭融也有脆弱的時候。