徐淑敏護膚險變鍾無艷

徐淑敏（Suki）出席活動時自爆做白老鼠測試自家護膚品，結果令面部又紅又腫，幸而敷冰後才沒事，她又指曾找老公黃浩測試新產品，搞到老公塊面腫過豬頭。

藝人徐淑敏昨日出席《Mikiki築地祭》開幕禮，她大爆險變「鍾無艷」不能出席活動：「因為我推出自家護膚產品，所以我做白老鼠，點知搞到塊面又紅又腫，好彩即刻敷冰先冇事。（唔搵老公試？）我之前試過，跟住佢塊面腫到豬頭咁，仲發脾氣掟爛晒啲櫈，唔敢再搵佢試。（做你身邊人好慘！）我唔會搵囡囡試，不過我陣間都會試用痔瘡膏搽眼，因為聽聞可以去黑眼圈。」

帶寶貝女學游泳

此外，原本出席的板前及板長壽司創辦人之一鄭威濤（Ricky San）因病缺席，問Suki有否留意好友鄭威濤因被指私自開設公司經營板前的分店，以及另開生意性質相似的公司板長搶板前生意而被控告時，她說：「唔知，都有一段時間冇見佢。（出席日本活動，唔怕反日情緒？）政治留番畀政治家啦！呢個活動會籌款幫災難嘅人做心理輔導。」Suki又表示於《全港哀悼日》有為撞船意外的死難者默哀，更指決定帶兩個寶貝女學游泳：「因為我哋全家人都唔識游水。」

美容針風險高

對於有女子因到美容中心接受靜脈輸液治療而情況危殆一事，Suki昨日接受電話訪問時表示感到不開心：「冇諗過有女仔為咗靚，連命都唔要。」她又表示注射式的美容針風險極高，自己愛天然產品，所以自家公司亦不會提供注射式美容服務。問到會否考慮醫學美容時，她說：「未試過打Botox，呢刻亦都唔需要。（唔排除將來打？）唔肯定，可能第時頂唔順啲皺紋會打，或者將來鍾意自然美。」