陳豪有囍撼太監祥仔

有份參演四套台慶劇的逾百藝員昨日出席無綫台慶亮燈,上演視帝前哨戰!兩屆視帝黎耀祥抽中獎,旺氣大增!愛情得意的陳豪則「娶」女友搶鏡!

無綫昨日舉行45周年台慶活動,雲集四套台慶劇《大太監》、《名媛望族》、《天梯》及《雷霆掃毒》逾百藝員,兩屆視帝黎耀祥及資深演員劉松仁企近中間,陳豪則與女友陳茵媺(Aimee)恩愛搶鏡,未到頒獎禮已上演視帝前哨戰!

台上播放幾套劇的精彩片段,劉松仁在《名》劇中有五位太太,享盡艷福,更與賈曉晨咀嘴,令人睇到嘩嘩聲!陳豪則上演踢轎門迎接女友Aimee谷《天》劇,即被司儀鄭裕玲(Do姐)取笑:「就嚟結婚呀?」事後兩人笑言只是搞氣氛,問到是否渴望於台慶頒獎禮齊齊攞獎?Aimee說:「冇諗呀!順其自然,我好鍾意套劇,好感人,好代表到Love!」陳豪則表示以平常心看待,亦不介意屆時再被玩。

哀悼海難死者

至於黎耀祥獲抽中成為45位得獎藝員之一,他笑言是好兆頭,問到可有信心憑《大》劇再贏視帝?他說:「五五波啦!但套劇衫同景都靚,今次同胡定欣再有床戲,不過冇用啦!七情冇慾(因演太監)!」

此外,梁乃鵬首次以行政主席身份主持亮燈儀式,獲出爐港姐張名雅及黃心穎谷胸相伴,問到是否刻意Push Up?張名雅說:「着咗應該要着嘅嘢,今日隆重吖嘛!又唔係無啦啦着泳衣!」活動上,約70位行政人員穿素服與藝員低頭默哀3分鐘,哀悼南丫島海難死者,多位高層包括陳國強、鄭善強、樂易玲及新加入任業務發展顧問的名媛李桂蘭均有出席,期間樂易玲更多次拭淚。

另一方面,Aimee不怕陳豪呷醋,最近處女下海,遠赴泰國擔任護膚品牌代言人,並以泳裝亮相。為求效果完美,她甘願攀山涉水,爬上峭壁取景,卻直言膽怯,幸而獲工作人員鼓勵,令她倍添信心,結果愈爬愈高。

影視組

陳豪出力踢轎門,迎接女友陳茵媺,未知兩人何時才嚟真呢?

祥仔拖着米雪現身谷劇,兩人指獎項多多唔拘。

陳茵媺大晒美好身材,並暢談護膚之道。

張名雅(右)與黃心穎大騷事業線,非常搶鏡!

李桂蘭(左二起)、鄭善強、陳國強及梁乃鵬等一同默哀。