趙世曾招婿拍成西片

卓能（集團）主席趙世曾為棒打女兒趙式芝（Gigi）的同性婚姻，不惜出五億招婿，事件轟動國際，更成為荷里活片商的生財工具，宣布拍成電影！兩位主角趙世曾及Gigi大方表示不介意事件被「搞大」，Gigi更親自「點兵」想辛康納利飾演其父。

趙式芝（Gigi）上月公開承認與波爾錶太子女楊如芯（Sean）於外國結婚後，震驚名人界，父親趙世曾卻隨即發聲明澄清，為求將女兒由攣變直，更豪言擲五億元搞招婿，事件充滿娛樂性，哄動國際，除被外國傳媒連番報道外，荷里活派拉蒙電影公司前日更宣布，要將故事改編成電影，取名《The Lesbian》（中譯：女同性戀者），更找來英國著名諧星「波叔」沙查巴朗高漢（Sacha Baron Cohen）的公司Four By Two Films監製。電影現只是初期製作，還未決定編劇人選，但相信波叔亦會參演電影大賣搞笑演技，有指他可能演趙世曾的角色，或飾演接近其女兒以取得獎金的男人。

受困擾又喊又失眠

Gigi昨日接受電話訪問，大讚波叔演技非常好笑︰「有時都會追佢啲戲睇，幾好笑，但Sean就唔識笑，不過冇人搵過我哋話要拍。」Gigi不介意被改拍成電影，但笑言未必好睇過現實版︰「冇得介意，人哋搵條橋，西方反而唔會覺得父親會做咁嘅嘢，但現實一定好睇過拍出嚟，而且好難搵到父親咁靚仔嘅人扮，七十幾歲都咁靚仔，好難有人同佢比。」

雖然電影開拍仍於初步，但Gigi已率先親自揀蟀，理想人選首推第一代占士邦辛康納利（Sean Connery）、《魔盜王》女星姬娜萊莉（Keira Nightley）和《黑天鵝》女星妮妲莉寶文（Natalie Portman），她說︰「如果要搵人演父親就揀辛康納利，姬娜就扮我，妮妲莉就做Sean。（點解揀佢哋？）感覺。」其後她直言近日為事件經常失眠及流淚，希望盡快平息，又強調與父親未有因此爭拗︰「只係大家唔知點面對，好迷惘，近日有好多人滋擾，但用平常心面對，唔想父母辛苦，唔想阿Sean唔開心。」她透露父親五億招婿後，其電郵及社交網均被塞爆︰「社交網站同電郵超過二萬幾人，交畀人處理，盡量唔睇，費事影響心情。」

至於趙世曾接受電話訪問時透露未有片商聯絡他︰「知美國有唔少有關報道，仲未了解件事，聽聞兩億美金拍，但冇人同我聯絡，如果有興趣，唔介意畀資料佢。（搵你客串？）都未係事實，唔回應。」此外，他指公開招婿後，已有數千名應徵者，他說︰「好多都係大好青年，有畀Gigi睇，但唔會勉強佢。」