Kay鐵價埋班 新一姐「事業」輸鍾嘉欣

謝安琪（Kay）昨日出席星煥國際周年活動，正式宣布加盟，公司總動員晒冷，打扮密實的Kay穿連身長裙，被穿Tube Dress的鍾嘉欣搶盡風頭，但Kay全程傍住老闆何哲圖，盡顯一姐地位。

謝安琪昨日在《星煥國際強勢邁進三周年》活動上宣布加盟，甫上台即率眾人為南丫島撞船慘劇默哀。事後受訪時，她否認踢走陳法拉坐正：「大家都係公司一分子啫！」問到有傳她以500萬元簽約2年？Kay不欲多談：「合約內容唔詳細講喇！總之冇減價，條件好優厚，係開心嘅合作！」她透露與蘇永康的合唱歌已派台，新碟則要明年才推出。

戥黎樂分手可惜

對於黎明和樂基兒「分手」，Kay說：「喺我心目中佢哋係一對好漂亮嘅Couple，好可惜！」她又指自己沒有甚麼夫妻之道：「不過我認為有小朋友對一段婚姻有好大幫助，有個共同目標！」

同場的鄭欣宜力撐Kay，不覺得她搶了一姐之位：「佢加盟係幫公司升呢！佢好正，事業家庭都咁成功！」欣宜又指已瘦了10磅：「遲吓有跳舞歌要開始Keep Fit，希望大家聽我唱歌啦！唔好再望住我啲肉餘震！」問到可想交個歌手男友？她笑說：「你哋介紹畀我啦！（鍾情韓國仔？）冇咁嘅事，我依家Single（單身）！」