志偉娶新抱送鑽石

曾志偉細仔曾國猷昨晚在尖沙咀筵開36席娶新娘張可蕙，志偉娶新抱兼賀孫兒百日之喜，大批親友遠道回港恭賀志偉雙喜臨門，新老爺揚言開心到向家族女成員豪派鑽石。

志偉表哥馬時亨、成龍、張學友、陳百祥、吳君如、佘詩曼、洪天明夫婦及譚詠麟等，昨晚均有到賀曾志偉榮升老爺，全晚笑到「四萬咁口」的志偉說：「最開心係成家人影大合照，好耐冇試過四代同堂，估唔到我家族咁大，四個仔女仲擺番童年相擺過嘅甫士影相，好得意！（前妻寶媽有冇到？）冇，我好多老婆o架！（送乜畀新抱？）玻璃頭（鑽石），家族入面嘅女性都有，都七位數字o架！（送乜畀個孫？）包場囉！唔係計錢嘅！」

謝絕日本受勳

明年踏入六十歲的志偉說：「出年六十大壽會同親友先去外地玩，再返香港慶祝生日。（因中日關係緊張而推咗日劇《金田一少年事件簿》？）錢事小，咁嘅環境點拍？仲推咗日本旅遊特輯，日本政府想向我授勳，我都婉拒。」提到關淑怡早前疑萌輕生之念，志偉說：「試過打畀佢，佢託朋友同我講叫我放心，唔會做傻事，等佢心情好番會約食飯。」

而志偉長子曾國祥不介意被細佬「爬頭」結婚：「同阿爸阿媽講過，唔好靠我結婚生仔。（送乜禮物賀細佬？）我哋兄弟姊妹、堂兄弟姊妹夾份送蜜月之旅，但佢未定去邊。（細佬個B似志偉？）似細佬同阿婆喎！」