整月餅餵狗 陳嘉桓冇男友做白老鼠

陳嘉桓昨日出席活動表示，原來她最愛在家下廚，撚手小菜是煮花蛤，被問是否煮給男友吃？她坦言未有人追，冇人欣賞。

陳嘉桓（Rose）前晚出席時裝店活動，穿上毛毛衫的她自嘲似狗：「我前一晚試着，屋企隻狗狗以為我係一隻大狗，狂吠我。」愛下廚的她表示最近學識整月餅：「係畀狗仔食嘅！我都想整真月餅畀人食，不過未搵到男仔做白老鼠試食。」同場的雨僑表示將離開《姊妹淘》出碟及拍戲，自改名後工作順利。

另外，昨日Rose在另一個活動《2012台灣咖啡葡萄節》上大展廚藝，她稱家人試過其手勢也表示OK：「我最鍾意煮花蛤。（煮畀男仔食？）冇人追，依家做嘢先！」

拍戲周身傷

活動完結後，Rose立即到東莞拍戲，談到無綫導演張永豪疑虐待女藝人劉蔚萱，她聲稱未試過被虐待，問到有武功底子的她是否冇人敢鬧？Rose說：「錯就要認，打就要企定！（粗口問候？）唔同人有唔同情緒，處理方法都唔同。（EQ高？）練少啲發脾氣，唔係會畀人話有公主病。」Rose今次在東莞拍戲有不少動作戲份，令她周身瘀傷，日前她更上載瘀傷到微博，不少影迷心痛不已。