曾憲寧變性戲上映有期
由「變性警」Kitty主演、年初在多倫多華人電影節勇奪「最佳男主角」的短片《無性界之婚》，連同另外兩套短片：《神召男》及《Cry 2》組成的《赤裸人性》，終於上映有期，監製聶凌率同片導演大爆辛酸：「我哋用咗一年，又搞業界放映會，但冇戲院肯上，有工作人員收過電話，講明唔想見到我哋套戲上映，可能變性人、殺人、強姦題材敏感，有人擔心會引起社會不安，為爭取上戲院，試到我都萬念俱灰，終於收到影藝肯上映嘅喜訊，好鼓舞。我希望我哋呢幾個搞短片嘅人呢次嘅經歷，可以鼓勵其他讀緊電影嘅年輕人勇往直前。」
《無性界之婚》導演曾憲寧說：「我哋三條片題材的確偏鋒，我同另一位導演嚴嘉兒選擇變性人題材嚟拍，搵真正變性人嚟演，只係想社會了解變性人多啲。（Kitty點睇喺戲院放映？）我哋好耐冇聯絡，唔清楚佢近況，但好多謝佢為呢套戲嘅付出。」
聶凌（左起）、曾憲寧和嚴嘉兒，對於短片可以上映大感興奮。