孫耀威打破偶像框框

孫耀威（Eric）曾被歸入為純偶像派，獲捧成「學生王子」，但做偶像卻限制多多且條件苛刻，令他大感「變態」，故Eric一度謝絕乖仔形象，更留鬚及長髮學做麻甩佬！

其實睇番咁多年娛樂圈嘅偶像，好多藝人都被包裝到「純偶像」，頭上好多光環，但做純偶像好易令到一個男人變態，好似連撩鼻屎都唔得，唔使咁苛刻啩？以前真係咁，唔可以有女朋友，又唔可以拍拖，講粗口仲死，太多嘢限制，好多偶像大個咗後，會有一段時期留鬚、留長頭髮、踢拖同着短褲，我都試過，王力宏都試過，當時會諗，點解限死我哋呢？

天生麗質

我鍾意飲酒同研究酒，會買紅酒書睇，以前仲喪劈酒，讀書時宿舍個雪櫃有各式各樣嘅酒，但依家一杯起兩杯止，重質不重量，因為酒量差咗，成日唔夠瞓，寧願以質取勝，唔想拎身體嚟「較飛」，同埋我作咗首叫《療Dry》嘅歌，係講依家好多人都Dry爆，心靈冇辦法得到滿足。

呢幾年畀人話我唔識老，又叫我「防腐威」、「不老孫」，其實都想多啲皺紋，好似梁朝偉咁，笑起上嚟幾Charm，有時我化妝特登唔搽Cream，笑起上嚟有啲紋，但我Enjoy喎，其實皮膚遺傳咗63歲嘅媽咪，佢依家睇落似40歲，皮膚好好。睇番我Daddy細個啲相，同我依家一樣，我會怕變肥佬，如果唔做呢行，我諗我會變王晶，因為太鍾意食嘢，愈肥嗰啲愈想食，但依家減肥，飲湯都只係食湯渣！

後記：「大」無畏

孫耀威雖然像個長不大的男生，思想卻相當成熟，正如他所講：「想做就去做！」或許是經歷了時間的洗禮，就連不少藝人最忌諱的情史，他都可率直地暢所欲言，加上有信仰支持，難怪他愈來愈豁出去呢！

（全文完）

口述：孫耀威　筆錄：專案組