丁子高父子檔掘金

與楊千嬅的愛情結晶品Torres出世後，帶旺丁子高工作不斷，最近更獲邀設計金飾。他在廣告中「出賣」囝囝的肥腳仔，又笑囝囝巨型，父子情深！

丁子高昨日出席Just Gold鎮金店《Just Babe x Real Ting系列發布會》時，獲贈囝囝Torres（丁進諾）的純金足印相架，首度設計金飾的他，為囝囝製作腳鏈，並與囝囝的肥腳仔一同拍廣告。

笑太太野性

丁子高笑指囝囝腳粗，3個月大已重16磅，甚為巨型，又大讚囝囝有做娛樂圈的潛質：「小朋友通常對有顏色嘅嘢敏感，雖然我部相機係黑白色，但我向住邊佢就跟住望邊。」現場展示丁子高的童年裸照，他笑言嬰孩時期很靚仔，而囝囝似足他。

對於被拍得與楊千嬅在街頭面燶燶，問到是否因太錫囝囝而冷落太太，他笑說：「唔通行行吓笑咩！（千嬅扁晒嘴？）天氣熱啫！冇嗌交！（佢有產後抑鬱？）冇，依家我哋嘅時間畀晒小朋友，唔想Miss咗佢任何階段。」曾以「暴龍」及「速龍」形容千嬅的他，笑指太太已慢慢變回小野兔：「唔係小白兔咁純，仲有啲野性！」並透露為囝囝辦妥入讀幼稚園事宜後，千嬅便會復工。

同場的張燊悅則自爆曾有產後抑鬱，更視丈夫為「出氣袋」，她說：「我都鬱咗兩次，特別係生第一胎時，覺得個個都忽略我，淨係照顧BB。」