周家怡被導演張永豪屈到喊

前無綫藝員周家怡憶述當年拍劇時與導演張永豪的不愉快事，她說：「佢當年做PA（助導），試過唔畀通告我又話畀咗，最唔開心係拍完之後，佢仲話以後要簽收Run Down，我話我唔會簽，因為佢根本冇畀我，佢仲叫我唔好玩佢，我就話佢連PA都不如！我當時好委屈眼都紅晒，佢話『唔係喊呀？我都識喊o架！大明星！』」她直言戥劉蔚萱感「陰功」：「事件針對事件唔針對人，咁樣方法教戲係咪啱先？」而曾傳出與張永豪有拗撬的陳曼娜，卻突然力撐對方，問到有關張永豪是曾勵珍親戚的傳聞，她說：「冇聽過，珍姐眼睛係雪亮嘅，大機構點會有呢啲嘢，你估監獄咩！」

而黃日華就張永豪疑虐待劉蔚萱一事，力證當年佘詩曼被鬧，他亦在場：「我識張永豪時佢做緊PA，咪就係見過阿佘（佘詩曼）畀佢鬧咗兩句嗰單，不過阿佘EQ好高、好堅強嘅。時代進步喇，我嗰個年代新人就打鬧中成長，依家要講道理。（珍姐力撐導演？）高層話啱咪啱囉！（二五仔拍片？）洩漏片段不足為奇，無綫應緝兇，避免事情再發生。」

另外，伍詠薇前晚出席活動時表示認識張永豪，談到事件，她表示因不在場，故不予評論，最好大事化小，不要斷章取義。