孫耀威婉婉「美」味相投

入行將近20年的孫耀威（Eric），圈中人緣甚廣，但他自言不愛「埋堆」，所以難維繫友誼，惟Eric與「圈中神婆」車婉婉甚為投契，每次拍拖也先帶給她過目！

老實講，我喺呢行做咗咁多年，我係識好多人，但朋友唔算話勁多，可能我個人唔埋堆，出面好多人叫我去玩，其實我Enjoy識朋友，但始終喺娛樂圈大家好忙，冇乜機會深交，深交唔到又好難維繫到一段友誼。

激讚軒仔Kelvin

圈中比較老友係車婉婉，我哋保持聯絡，我每次拍拖，都會先帶畀佢見我女朋友。我同婉婉10幾年前已經識，當時梁榮駿（唱片監製）曾經想簽我同佢，最後兩個簽唔成，但反而令我哋熟咗。我哋好夾，大家好美國化、鍾意美國嘢，價值觀又相似，我同佢嗰種友誼好似家人，有首新歌暫定叫《超友誼》，即係對方隨時明白我做緊乜，就算係做錯事，大家都互撐，鬼叫我哋係朋友！

除咗香港朋友外，我嘅台灣朋友亦比較多。出道時外界覺得我同林志穎係死對頭，但我哋其實幾好朋友，夜晚約出嚟一齊玩，不過依家我哋冇聯絡。

至於同公司同事關係幾好，我同Kelvin（關楚耀）、Kary（吳雨霏）、軒仔（張敬軒）會互發短訊，我係「友誼先生」，有乜幫忙都會幫！點睇呢班後輩？我覺得佢哋叻過我，軒仔除咗唱歌外，又擁有自己錄音室；Kelvin仔呢幾年經歷好多嘢，但佢識企番起身，畀着以前嘅我，都唔知自己做緊乜，我都花好長時間先有依家咁好嘅IQ同EQ。（明日待續）

口述：孫耀威　筆錄：專案組