Pinky遊記與錢掛鈎

自言有旅遊命的藝人張文慈（Pinky），自十七歲起已經常外遊，每到一個地方她都會儲起當地錢幣作紀念，看着家中大疊銀紙，連她也笑言數不清走訪過多少國家了。

藝人張文慈多年來經常周圍飛，每到一個地方都會儲當地錢幣作為紀念。談到她最喜歡的貨幣時，Pinky直言最喜歡澳洲紙幣，她說：「大部分國家都用紙嚟做錢，澳洲嘅紙幣係膠質，防水又唔易爛，同埋全部都好色彩繽紛。」

至於最有收藏價值的紙幣，Pinky雀躍地介紹一套人民幣紙幣套裝，內裏擺放各種面值的人民幣，大至一百元，小至連一分錢都有，特別之處是珍藏中包括數張人民幣的迷你版本，非常難得。當中亦附有紙幣的歷史簡介，Pinky說：「幾年前喺內地出席一個活動，個老闆送畀我嘅，佢話呢Set嘢要成幾千蚊人民幣，入面有啲錢依家已經唔再喺市面流通o架喇！佢無條件咁送畀我，真係好開心。」

「同齡」硬幣

眾多收藏中，Pinky最喜愛的竟是兩枚小小的硬幣。這兩枚分別來自美國及加拿大的硬幣，珍貴之處並非價值，而是一份心意：「係粉絲送畀我嘅，一來佢哋知我儲開男人頭像嘅硬幣，二來細心啲睇，個硬幣上印住嘅年份就係我出世嗰年，係佢哋特登搵嚟送畀我，所以收到嗰陣，真係好感動！」

為免糟蹋粉絲一番心意，Pinky特別用膠套入住兩枚硬幣，以免與其他硬幣碰撞弄花。