張慧雯怒摑宋熙年

無綫小花宋熙年和張慧雯最近齊齊扮「阿姐」，在劇中分別飾演年輕版的汪明荃和黃淑儀，開工首日即刻要拍掌摑戲，摑人的張慧雯嚇到騰騰震，反而要宋熙年指點！

宋熙年和張慧雯在新劇《巴不得媽媽…》中飾演年輕版汪明荃和黃淑儀，扮鬥氣冤家。不過，張慧雯開工第一日竟要怒摑宋熙年，更要捱摑的宋熙年教路！張慧雯說：「打人原來好驚，有啲手震，不過熙年好好，反而教番我點樣摑佢，佢話畀人摑好有經驗，情願出力啲，拍一、兩次完成，好過捱多幾巴！」她稱看過黃淑儀年輕時的相片，覺得笑起來十分相似！

拍劇冇底線

至於宋熙年提到劇中扮阿姐，問到事前可有向阿姐請教？她說：「冇呀！我哋唔會同場開工，唔敢特登問阿姐，惟有自己拍劇前做功課，上網睇咗好多阿姐嘅作品，最有印象係阿姐年輕時喺《家變》嘅造型，好靚！嗰時阿姐嘅造型仲帶起咗潮流。」

提到拍劇難忘趣事，宋熙年說：「印象最深當然係第一日開工就要畀張慧雯掌摑，不過自己真係好鍾意拍劇，希望第日可以多啲拍劇機會！做乜角色都冇所謂，賣魚妹、女警角色都得，只要係角色，需要可以話冇底線。」