Joey問伊健攞帖

樂壇天后容祖兒前晚錄影節目時遇見明年結婚的鄭伊健，她即恭喜兼攞帖，雖然慘食檸檬，但都會儲定人情及攞假飲喜酒！

容祖兒（Joey）、鄭伊健及羅力威等前晚錄影《勁歌金曲》，Joey甫見明年結婚的伊健即拱手恭喜攞喜帖，但伊健笑說：「派你個頭！」Joey表示會儲定人情兼度期飲伊健的喜酒，問到可心急結婚？她說：「唔急，上天會安排，我覺得好多嘢仲要慢慢學。（會唔會畀公開戀情嚇怕，唔公布婚訊？）每日感覺都唔同，隨心而發。」

提婚訊令人麻木

明年與蒙嘉慧（YoYo）拉埋天窗的伊健，笑言經常提及婚訊，會令朋友感到麻木，問到婚禮籌備情況，他說：「搞咗錢嘉樂嗰個先。（學嘉樂雙喜臨門？）唔會，但都係好事。（舊愛邵美琪恭喜你？）最緊要開心。（希望邵美琪快啲結婚？）開心就得。」而YoYo透過電話回應，指她與伊健到菲律賓舉行潛水婚禮的報道「創意無限」。

昨日走兩場的Joey，跟林峯及泳兒等到澳門出席記者會，宣傳下月1日的澳門音樂會。提到早前被本報拍得與舒淇同時在超市出現卻匆匆閃人，林峯說：「我見佢唔到！（以為係潘霜霜所以避？）唔係。」對於新劇未播出已有緋聞，他笑說：「當宣傳囉！」