關楚耀禁毒遭白眼

涉毒案險令關楚耀（Kelvin）「一鋪清袋」，所謂「知恥近乎勇」，他三年前開始常到學校分享個人經歷，但卻遇上學生以古怪眼神對待。

自從「嗰件事」之後，我同公司開過會，公司想我做一啲嘢「復出」，跟住就有首歌叫《一年》，係自己對件事嘅睇法。之後，我成日出席中學同小學舉行嘅分享會，去咗差唔多200間學校，成件事維持咗9個月！起初有幾場分享講座都講到喊，除咗諗番起當日情況外，仲有係自己幾緊張，唔知學生有乜反應。我確實見到有支持嘅，但亦見到有其他古怪眼神及面色，但我冇理會，繼續分享我嘅經歷，總之分享訊息係「做錯嘢就要承擔責任」，要以身作則。

做到最好作榜樣

我好快都三字頭，依家見到啲仔，甚至小朋友，細細個已經拎住手機同iPad玩，我嗰時讀書都未有呢樣嘢。係咪物質主義？我只覺得幾匪夷所思，同埋係呢代人嘅現象，冇話係咪好事嘅，亦都冇計，個潮流趨勢係咁，好睇家長點樣教導，但感覺依家年輕人比較缺乏個性同創意。身為80後嘅公眾人物，我覺得拍戲、唱歌有個責任，就係確保做出嚟嘅作品要有好質素，咁樣班年輕人先會有樣學樣，跟住做到最好。（全文完）

後記：錯就要認

「錯就要認，打就要企定！」筆者與Kelvin仔認識好幾年，知他本性不壞，更是個「吹水怪」﹗他三年前犯下彌天大錯，錯得令人痛心，幸能洗心革面，由返抵香港機場勇於認錯一刻，已知道「他回來了，他的勇氣也回來了。」現時的Kelvin仔事業愛情兩得意，相信愛錫他的人也鬆一口氣吧！