關楚耀感激阿倫不放棄

提起關楚耀（Kelvin），少不免令人想到其契爺譚詠麟（阿倫）！事實上，阿倫在Kelvin心目中地位崇高，縱使兩人的「父子情」已經昇華，但Kelvin對阿倫仍充滿敬畏！

契爺阿倫由細睇到我大，入行之後亦定時提點我，依家我哋通常喺微博互動，經常轉發唔同Link，有時互相留言吹水，有啲心照嘅感覺。起初接拍《喜愛夜蒲2》時，都有問契爺應唔應該拍，佢答我：「點解唔拍？有咁嘅機會！」其實我本身想接拍，只係想問佢同埋泰迪羅賓意見，始終第一次做男主角，難免會緊張，而佢哋都好支持我。

軒仔係密友

雖然契爺好錫我，但始終令佢失望過、傷心過，好彩佢仍然好緊張同關心我，所以依家最緊要係做好成績，好過話送啲乜嘢畀佢！若然將來有獎，就應該係報答佢嘅最好禮物。我同阿倫以「契爺、契仔」相稱，但至今仍然好驚佢，對佢好敬畏，佢對我同屋企人都好好，好細個已經聽佢嘅歌，佢有好多身份，係我契爺，又係我偶像，甚至係半個老竇，我唔介意外界叫我「阿倫契仔」，咁呢個係事實嘛！我有個咁把炮咁犀利嘅契爺，唔想影衰佢個名。

除咗阿倫之外，圈中都有好多朋友，好似軒仔（張敬軒）、Mr.等等，近排都有同佢哋短聚，佢哋係同事，亦係親密戰友，差唔多日日都見，好似家庭一分子，大家都合得來，女仔朋友？又唔會話特別避忌，朋友唔係男就係女o架啦，普通朋友吹水都好正常。

（明日待續）

口述：關楚耀　

筆錄：專案組