孕味呂慧儀秘現醫院

今日30歲生日的「長腳蟹」呂慧儀婚後一直不設防，早前被指谷奶疑有喜。日前本報發現穿平底鞋及鬆身衫的她，秘密到跑馬地醫院檢查，孕味十足，離開時需同行女友人攙扶上車，並由老公接走。

前港姐呂慧儀去年底嫁落選港男黃文迪後，一直努力「造」人，早前呂慧儀穿低胸晚裝出席港姐決賽時，上圍激凸爆發孕味，即被指有喜。今天30歲牛一的她，日前更被發現秘密現身跑馬地養和醫院作檢查。

當日傍晚六時許，戴口罩及眼鏡、穿平底鞋及黑色鬆身衫的呂慧儀由老公接載到達醫院，並由一名女友人陪睇醫生，全程低頭不欲被認出。逗留約一小時後，呂慧儀手持大袋藥物，期間不時要代拿X光片等文件的友人攙扶，至登上黃文迪的座駕時，友人亦小心扶她登車離開。

夾爆手勁瘀

事後記者聯絡呂慧儀，她否認到醫院驗卵：「唔係去驗卵，仲未有喜，有咗一定講。」並續說：「之前喺屋企畀廚房門夾爆手指，又瘀又腫，當晚已經去附近醫院睇醫生。之後再去養和睇，咁啱嗰日喺跑馬地附近，照咗X光知啲骨冇事。」她表示醫生建議她放血，但她怕痛而沒有實行。