關楚耀戒蒲變深閨

關楚耀入行初期形象討好，但三年前因涉毒案加上緋聞纏身，令乖仔形象插水。經過一番努力後，他變成深閨男並謝絕「飛來蜢」，情定圈外女友Megan。他將一連五天剖白內心世界，一切由蒲開始……

其實入行之後，我都試過同成班朋友一齊夜蒲，夜蒲通常令人諗起溝女、性、暴力甚至毒品。我以前去蒲都試過飲醉，仲試過飲到嘔，但我醉極有個譜，都有幾分清醒，知道自己做緊乜。我覺得蒲係一種文化，蒲腳男女都有，我又冇越軌行為，夜蒲不外乎同朋友唱K、跳舞、吹水飲酒，係屬於正常嘅社交生活，我去蒲純粹同朋友聯誼，又唔係去溝女，夜蒲唔等如係「蒲精」。

愛聯誼Social

呢兩年形象變Man咗，但唔算花弗，喺我嘅理解，「花弗」係指溝女、女伴經常轉，但我只係同朋友飲嘢，亦識抗拒「飛來蜢」，會畀Signal佢哋。自從拍《喜愛夜蒲2》，識多咗好多人，不論男或女都搵自己合照，覺得好開心！

雖然話曾經鍾意夜蒲，但講真年紀大咗，個人都變得深閨，收工後想休息多啲，否則好易殘爆。近排我都少肉多菜，仲有拍劇時自備健身器材，唔使埋位時就喪操喼弗。

Update衞詩近況

依家我同圈外女友Megan拍拖兩年，感情穩定，我哋都試過夜蒲。每個人有佢社交圈子，我唔會過問女友同邊啲人蒲，佢有冇「飛來蜢」？我又冇諗喎！總之我同佢依家感覺良好，我唔鍾意懷疑自己伴侶，對佢百分百信任，佢同邊個出去玩，我唔會過問，亦唔會Check實佢，最緊要係識得保護自己同埋識衡量。

我嘅愛情觀就係舒服同簡單，會有適當嘅浪漫，絕對唔會霸佔對方，各有私人空間。其實公開戀情後成件事舒服咗，唔使收埋，到之後我哋畀人影到，冇乜嘢要瞞住大家，最緊要互相尊重，理會對方感受。

雖然同Megan感情幾好，但我哋又未諗到結婚呢個課題，我依家29歲，好多Planning，佢亦有佢工作，大家做好手頭工作先，結婚最緊要有穩定經濟基礎。我嗰一年（因涉毒案）冇工作，失業咗成年，都幾徬徨！所以依家繼續搏殺。生小朋友？會嘅，但仲係好長遠。

我明白傳媒有時工作所需，會重提我同衞詩（Jill）嘅舊事，我唔會太介意，始終係發生過，同埋自己都開竅咗。早排傳佢同男友結婚，記者都有問我，其實我哋有Update對方近況，但我唔識佢現任男友，只知道佢依家有拍拖已經OK。（明日待續）

Profile

姓名：關楚耀（Kelvin）

背景：加拿大出生，父親關維麟是寶麗金年代當紅監製，伯父為藝人泰迪羅賓，契爺是歌手譚詠麟。

情史：2006年與衞詩傳緋聞，2009年2月同遊日本捲入藏毒案被捕，戀情曝光後即宣布分手。其後，他搭上台灣前「黑澀會」成員Mika（王義廷），但沒有公開承認女方地位。現今Kelvin與圈外女友Megan拍拖兩年多，感情穩定。

口述：關楚耀　

筆錄：專案組　

攝：沈健程