on.cc 東方互動主頁

港姐三甲爆心嗰句認真，你就輸！

當大家認真對待一人一票選港姐時，原來認真你便輸了！出爐冠軍張名雅（Carat）夠大方；亞軍黃心穎（Jacqueline）夠過癮；季軍朱千雪（Tracy）夠親切，好比出奇蛋般滿足大家三個願望，至於何解冧Server？咪當笑話看待囉！港姐每年都選，輕鬆啲啦，香港人！

張：張名雅　黃：黃心穎　朱：朱千雪　記：記者

由「冧檔」開始……

當無綫公布一人一票選港姐時，真的令人雀躍萬分，但當你認真，冧Server結果可能令你心有不甘。冇辦法，連三位出爐港姐當晚亦以為大會說笑，就知道甚麼叫做現實！

記：當晚曾志偉公布冧Server，覺唔覺得大會玩嘢？

張：以為佢哋講笑，可能我太緊張，當時聽唔到噓聲！後尾返屋企睇電視，真係聽到有噓聲。大家都希望一人一票，可惜落空，我理解！

記：係咪一早Call定姨媽姑姐投票？

張：哈哈！屋企人一定支持，佢哋投唔到票好失望！

朱：當時係聽到噓聲，我以為佢哋呼應司儀嘅笑話。無論一人一票或評判揀都咁緊張，冇諗過邊種方式較公平，只想快啲宣布結果！

黃：我真係以為志偉講笑！後尾諗番永遠都係一個問號，咁可能係一種遺憾美，開心就得，係咪？令我一世記得！

記：有陰謀論成分？（三人同聲：唔會）

黃：大家都想有突破，我諗公司會再試，希望做得到！

張：我好信TVB，佢講得出會盡力做，只可惜技術出錯！

朱：咁創新嘅Idea大家都希望成功，我唔相信陰謀論！

記：由評判定生死，覺唔覺得唔公平？

張：一人一票選港姐真係史無前例，係好嘗試！希望觀眾唔好太Focus流選，多啲留意我哋嘅努力，對我哋會公平啲！

清楚遊戲規則

黃：由評判去揀，優勢在專業經驗；觀眾可能只係睇到我哋當晚嘅表現或者新聞，不過佢哋揀嘅好處係唔覺得有內定，所以我認為兩者都OK！

朱：我唔覺得唔公平，亦唔覺得自己係最大受害者！評判都係香港人一分子，佢哋都想揀一個具代表性嘅女仔做香港小姐。

記：會唔會覺得變番小圈子選舉？

朱：唔會！由頭到尾我哋都好清楚個賽制，大會都畀好高透明度我哋，所以成件事我哋都知個遊戲規則點玩！

張：評判心目中早已有一套選三甲嘅準則，佢哋都係社會上有地位嘅人，好能夠代表香港人。

假如從頭投過……

星移物換，從頭再來，若然沒有冧Server，張名雅、黃心穎及朱千雪又手握一票，究竟她們會選誰做冠軍？

黃：我會投畀張名雅，因為由Day 1開始佢就好穩定，評判畀佢嘅分都好高，代表佢真係每方面都做得好好！Tracy嗰晚表現都係Perfect，一開始佢畀人話身材唔夠好，到依家簡直弗到漏！

張：上得舞台都想做好個騷，一樣希望贏。好似Tracy咁，睇住佢愈嚟愈靚，好畀心機做好件事！佢笑容好親切，如果要揀冠軍真係好難，我揀自己同千雪啦！

朱：我知道我哋三個都想自己係冠軍，佢哋兩位其實都好好！Carat畀到我好Elegant（高貴）嘅感覺，好有香港小姐嘅感覺！Jacqueline性格好特別，知道香港小姐係要點，佢亦唔會好死板做一個香港小姐，會將自己嘅元素加入去，好值得入三甲！

張：我覺得Jacqueline好畀心機，我喺溫哥華已經識佢，呢幾個月見多咗，發現佢真係好有才華！

勾心鬥角背後……

擘面容易相處難，要在短短數月建立友誼殊非易事，但三位出爐港姐竟能做到知心友，實是難得一見！到底港姐除了勾心鬥角，她們都是好Pure好True的傻大姐，純真的友誼就是那麼簡單。

記：港姐咁多是非，你哋表面咁Friend，其實係咪好姊妹？

朱：我哋冇乜是非，個個都係好朋友，工作完私下都會約出嚟行街、睇戲，會傾私人嘢，唔比較就唔會有勾心鬥角！

黃：唔會有太大是非，只係如果啱傾咪一齊放工，好正常！

張：我同咁多個女仔都建立咗好好嘅友誼，只不過今年多淘汰環節，好似突然冇咗啲朋友！

記：相處多月，覺得對方係一個點樣嘅人？

黃：千雪好勇敢，由一開始參選就好努力改變自己，畀着我一定唔夠膽，一定參選前已Keep好Fit，佢好有自信！Carat係一個好清楚自己要乜嘅人，進步好大！

既Pure又True

張：我成日想Jacqueline教我跳舞，我跳得有佢一半功力就好。佢係一個好開心嘅女仔，性格好真！Tracy就好親切，面試個個女仔一定化行妝，不過佢竟然化淡妝，佢係一個傻大姐，大把搞笑嘢，最鍾意跳八爪魚舞！

朱：我覺得Carat係好女仔，喺鏡頭前面永遠都好認真、好淡定。其實佢好Funny，思想只係向好嗰方面去諗！依家選咗出嚟，佢好顧及我同Jacqueline感受，有一日佢問我：「千雪，你有冇唔開心？」佢係冠軍，已經唔需要去關心你，但佢會理我哋開唔開心，我真係好感動！（此時發生小插曲，詳看後記）而Jacqueline就好有準備，一早知自己做乜，同我相反！