陳僖儀扮貞子細路當真

歌手陳僖儀（Sita）是調皮妹一名，從小已愛上扮鬼臉，更因扮電影角色「貞子」而大受歡迎，她說：「喺唔同場合扮唔同嘅嘢，有次同成班同學去鬼屋玩，因為當時頭髮好長，前面頭髮遮晒個額，有個小朋友以為我係鬼屋職員，猛咁指住我話：『媽咪！貞子呀』仲走埋嚟影相。」個個同學仔無不捧腹大笑，成為聚會必講的瘀事。問到會否怕經常扮鬼樣而嚇怕追求者？Sita說：「好少喺男仔面前咁做，如果有男友都夠膽扮o架！做得男友梗係要接受我，唔一定係靚樣。」疼錫歌迷的她閒時亦會與歌迷玩自拍，當中不乏古靈精怪樣，難道不擔心歌迷流傳出去？Sita說：「唔驚！人都有過去，冇所謂！加上歌迷都好乖。」

擁有長髮的陳僖儀面部表情變化多端，扮鬼臉確實神似！