朱紫嬈私家狗司令自創訓犬秘殺技

創作女歌手朱紫嬈（Khloe）於家中身兼犬隻訓練員，對訓練小狗甚有心得！養有四隻小狗的她分享訓練狗隻的難處及經驗，還分享訓練犬隻必備的秘密武器！

除了愛音樂外，朱紫嬈（Khloe）亦十分喜歡動物，家中更養有四隻小狗，還透露兒時曾想過當犬隻訓練員！雖然最後當上歌手，但她未有忘掉兒時夢想，改為擔任私「家」犬隻訓練員，負責訓練家中愛犬，故對訓犬亦有一手！

Khloe家中養有三隻長毛芝娃娃及一隻玩具貴婦犬，其中黃白色的長毛芝娃娃「Rain豬」是家中的表演狗，學識最多指令：「佢係屋企咁多小狗入面識得最多指令嘅，除咗最簡單嘅Sit（坐低）同Hand（畀手）之外，仲識得請請同扮死！」

同伴多易分心

不過，她直言訓練狗狗並非易事，全因小狗與小朋友一樣，容易心散：「教佢哋嘅時候通常由幾個月大開始，Rain豬係我第一隻養嘅狗，因為教佢嘅時候得佢一個，所以佢會專心啲。之後養多咗狗，佢哋就會因為多咗同伴而變得容易分心，唔肯學！」因此，Khloe叮囑大家如飼養多隻小狗的話，訓練時必須把牠們分開，以免正學習指令的小狗分心。

訓犬Point 1：零食

「訓練狗狗嘅時候一定要有零食，呢樣係教狗狗做指令嘅秘密武器！如果小狗做極都做唔到，但佢已經好努力，可以畀零食去鼓勵佢，等佢唔好放棄。」

訓犬Point 2：時間

「唔可以長時間訓練小狗，因為佢哋都會攰，所以每次教15分鐘左右就要畀佢哋休息吓。其中『請請』同『扮死』呢兩個指令最難教，所以需要更多耐性。」

訓犬Point 3：漸進

「每次教完一個指令先開始教第二個，好似教佢哋畀手咁，大概教咗Rain豬兩個星期就學識，等佢哋學識一個指令先再教第二個，如果唔係佢哋會好容易混亂！」

史納莎夠醒目

朱紫嬈的兩頭長毛芝娃娃犬，身形的骰可愛兼精靈活潑，深得主人愛錫。其實除了芝娃娃屬聰明犬種外，史納莎亦是小型犬中另一被喻為「具有人類頭腦的狗」！記得一隻史納莎曾擔任廣告狗明星，懂得開門、開水龍頭，還會遞報紙給主人，亦因這隻明星狗太醒目的關係，坊間曾掀起一片養史納莎的熱潮。

虎父無「犬」子

鄺美雲

教識愛犬Cash與Euro不少指令，還帶牠們探訪老人家，使出「看家本領」氹得老人家非常開心！

彭健新

愛犬OK仔經常上電視節目，除了識表演「請請」外，亦識得「扮死」冧觀眾。

吳日言　

除了懂得幫愛犬扮靚外，訓犬一樣難不倒她，只要吳日言一聲令下，愛犬即乖乖Stand and Sit！