盧淑儀帶睇騷克勤見仔仔冧晒

李克勤前晚開騷，向來低調的太太盧淑儀罕有帶同大仔Ryan捧場。坐第一排的Ryan見爸爸出場即興奮揮手，其後更上台獻花，氹得克勤全晚四萬咁口！

李克勤前晚為新碟舉行音樂會，除太太盧淑儀及大仔Ryan（李立仁）外，捧場的還有同門師弟林德信、Mr.成員Dash及MJ等。克勤甫出場即對着坐在第一排的仔仔Ryan揮手，跪在椅子上的Ryan亦非常雀躍，不停揮手，其後更上前獻花，令克勤笑到見牙唔見眼！

祖兒香閨取景

演出期間，大銀幕播出克勤多位好友的照片及短片，包括校長譚詠麟的腳部自拍照，克勤趁機寸爆早前爆桃色醜聞的余文樂，並哈哈大笑說：「除咗校長外，其實余文樂都好鍾意影腳，但就唔小心Send錯咗畀人！」他又以新歌《小題大做》比喻無綫與四大唱片公司的關係：「本來好小事，但搞到我返唔到TVB唱歌！」銀幕隨即播出鄭裕玲的片段，她說：「着住呢套衫去唱一定掂！」台上即出現蒙面歌手龍小菌的紙板公仔，而克勤則站在紙板後唱歌。其後，銀幕又播出克勤到容祖兒香閨訪問其女傭的片段。完騷後，克勤表示很感激祖兒借出「姐姐」拍攝，談及無綫有意一人一票選出獎項得主，他說：「搞得成梗係好，有得參與嘅話，我做咩都冇問題！」

此外，克勤昨日以隊長身份，率領足球隊與陳百祥的球隊作賽，最後以3比1勝出。談及國民教育，他避忌地表示仔仔仍就讀國際學校。